Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 383 Hüküm no: 492 Orijinal metin no: [84b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Hızır’ın evini Sâliha bt. Abdullah’a satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Süleyman Çelebi mahallesi sâkinlerinden Ramazan b. Hızır nâm kimesne meclis-i şer‘de hâmiletü’l-kitâb Sâliha bt. Abdullah nâm hâtun mahzarında bi’t-tav‘ ikrâr ve takrîr-i kelâm edip mahalle-i mezbûrede vâki‘ bir tarafdan Süleyman ve İsa ibney Veli mülküne ve bir tarafdan yine benim mülküme ve iki tarafdan tarîk-i âma müntehî ve mahdûd iki tahtânî beyti ve çardağı ve zât-ı eşcâr-ı müsmire ve gayr-ı müsmireyi hâvî ve cüneyneyi müştemil olan mülk menzilimi ve yine menzil-i mezbûr kurbunda cârî olan ayazmadan hakk-ı şürbü mezbûre Sâliha Hâtun’a altı bin nakd-i fıddî-i Osmânî râyic fi’l-vakt akçeye bey‘-i bât ile bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân menzil merkūme Sâliha’nın mülk-i müşterâ-yı sarîhidir keyfe mâ yeşâ ve yahtâr mutasarrıfe olsun dedikde mukırr-ı mezbûrun ikrârını el-mukarru lehü’l-mezbûre Sâliha Hâtun bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sânî aşer min Şevvâli’l-mükerrem li târihi’l-mezbûr. Şuhûdü’l-hâl: Sunullah Efendi b. Siyâmi el-İmâm, Sefer Bey b. Mehmed, Derviş Mahmud b. Hüseyin, İbrahim b. Çalabverdi, İbrahim b. Halil, Molla Mahmud b. Ali, Süleyman b. Veli, İsa b. Veli, Yakub b. Kurd, Bayram b. Abdullah, Şaban b. Yusuf, Perviz b. Abdullah ve gayruhüm mine’l-hâzırîn.