Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 384 Hüküm no: 494 Orijinal metin no: [85a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yano v. Yani’nin daha önce satın aldığı bağı Yorgo v. Niko’ya iade etmesi Vilâyet-i Rumeli’nde Delvine kazâsına tâbi‘ Gardik nâm karye sâkinlerinden Yano v. Yani nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yorgo v. Niko nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip bundan akdem mezbûr Yorgo karye-i merkūmede vâki‘ iki tarafdan Ali Bey b. ( ) mülküne ve bir tarafdan Dimo v. ( ) mülküne ve bir tarafdan cebele müntehî olan bir kıt‘a bağını bana iki bin yedi yüz nakd-i fıddî-i Osmânî râyic fi’l-vakt akçeye bâtten bey‘ edip kabz-ı semen ve teslîm-i mebî‘ eylemiş idi hâlâ mezbûr Yorgo ile bey‘-i mezbûru ikāle murâd eylediğimizde rızâmız ile ikāle edip meblağ-ı mezbûr iki bin yedi yüz nakd-i mezbûrü’n-na‘t akçeyi mezbûr Yorgo yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân bağ-ı mezbûr Yorgo’nun mülk-i sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun ikrârını el-mukarru lehü’l-mezbûr Yorgo vicâhen tasdîk edicek mâ hüve’l-vâki‘ gıbbe’t-taleb ketb olundu. Hurrire fî 18 min Şevvâli’l-mükerrem li târihi’l-mezbûr. Şuhûdü’l-hâl: İlyas Hâce b. ( ) el-İmâm, Ahmed Dede b. Hüseyin, Yani v. Otaki, Kalviri v. Dado, Yani v. Dimo, Tano v. Kino, Yani v. Kolaşi ve gayruhüm mine’l-hâzırîn.