Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 384 Hüküm no: 495 Orijinal metin no: [85a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mustafa’nın evini Ebûbekir Bey b. Abdurrahman’a satması Mahmiye-i Kostantıniyye -humiyet ani’l-âfât ve’l-beliyye- hısnı ebvâbından Topkapısı hâricinde vâki‘ İlyaszâde mahallesi sâkinlerinden Mehmed b. Mustafa nâm kimesne meclis-i şer‘de işbu hâmil-i hâze’l-kitâb fahrü’l-akrân Ebûbekir Bey b. Abdurrahman nâm bevvâb-ı sultânî mahzarında ikrâr edip mahalle-i mezbûrede vâki‘ bir tarafdan Murad Bey b. Abdullah mülküne ve bir tarafdan es-Seyyid Abdi b. es-Seyyid Mahmud mülküne ve bir tarafdan el-Hâc Subaşı b. Abdülmennân mülküne ve bir tarafdan müşterî-i mezbûr mülküne müntehî iki tahtânî beyti ve hadîkayı ve bi’r-i mâyı ve muhavvatayı ve kenîfi müştemil olan mülk menzilimi cümle-i tevâbi‘ ve levâhıkı ile mezbûr Ebûbekir Bey’e altı bin akçeye bey‘ edip kabz-ı semen ve teslîm-i mebî‘ eyledim dedikde mukırr-ı mezbûrun ikrârını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek gıbbe’t-taleb ketb olundu. Hurrire fî 20 min Şevvâli’l-mükerrem [li târihi’l-mezbûr]. Şuhûdü’l-hâl: Mustafa Halîfe b. Abdurrahman el-İmâm, Süleyman Halîfe b. Mehmed el-İmâm, es-Seyyid Abdi b. es-Seyyid Mahmud el-Müezzin, Hasan b. Hüseyin, Murad Bey b. Abdullah, Pervâne b. Abdullah, Hasan b. Abdullah, el-Hâc Mustafa b. Abdullah, Perviz b. Abdullah, Mustafa b. Mehmed, Ali b. Abdullah.