Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 385 Hüküm no: 497 Orijinal metin no: [85a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Danyal v. Yorgi’nin yurt yeri, yoncalık ve tarlasının tasarruf hakkını Nuhur Kostrova köylülerine devretmesi Vilâyet-i Rumeli’nde İnebahtı sancağında Çatalca kazâsına tâbi‘ Nuhur Kostrova nâm karye sâkinlerinden Danyal v. Yorgi nâm zimmî meclis-i şer‘de işbu hâmil-i hâze’l-kitâb karye-i merkūme ahâlîsinden Pavlo v. Nikola ve Yani v. Mihal ve Şiro v. Yorgi ve Yani v. Yorgi ve Dimo v. Yani ve Yorgi v. Yani ve Kosta v. İstati ve Ergiri v. Yorgi ve Hristo v. Dimo ve Mihal v. Yani ve sâirleri mahzarlarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ iki tarafdan tarîk-i âma ve bir tarafdan Dimo v. Pavlo mülküne müntehî bir kıt‘a harâbe yurd yerimi ve yine karye-i merkūme kurbunda vâki‘ bir kıt‘a mülk yoncalığımı cümle-i tevâbi‘ ve levâhıkı ile bi safkatin vâhidetin mezbûrûna bin nakd-i fıddî akçeye bey‘-i bât ile bey‘ ve kabz-ı semen edip mebî‘ân-ı mezbûrânı mahallinde kabza müşteriyyûn-ı mezbûrûnu taslît eylediğimden sonra yine karye-i merkūme sınırı dâhilinde vâki‘ her biri lede’l-ahâlî ma‘lûmü’l-hudûd mutasarrıf olduğum üç kıt‘a tarlaların dahi hakk-ı tasarrufunu sâhib-i arz ma‘rifetiyle mezbûrûna tefvîz edip mukābelesinde mezbûrûn yedlerinden dört yüz nakd-i fıddî akçeyi bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ler merkūmûnun mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufları merkūmûnundur sâir emsâli tasarrufları gibi mutasarrıf olsunlar dedikde mukırr-ı mezbûrun ikrârını el-mukarru lehümü’l-mezbûrûn bi’l-muvâcehe tasdîk edicek gıbbe’l-ibtigā sebt olundu. Hurrire li târihi’l-mezbûr. Şuhûdü’l-hâl: es-Sâbıkūn.