Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 386 Hüküm no: 498 Orijinal metin no: [85b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Veli’nin kendisiyle ortak olduğu ev hissesini karısı Ayşe Hâtun bt. Ali Hâce’ye satması Medîne-i Ebâ Eyyûb el-Ensârî -râdiye anhu Rabbühü’l-Bârî’de merhûm Şeyh Ahmed mahallesinde sâkin Ali b. Veli nâm kimesne mahfil-i kazâda zevcesi işbu bâ‘isetü’l-kitâb Ayşe Hâtun bt. Ali Hâce muvâcehesinde bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Ahmed b. el-Hâc Mehmed mülküne ve bir tarafdan Rüstem Beşe mülküne ve bir tarafdan merhûm Yakub Ağa vakfı’na ve bir tarafdan tarîk-i âma müntehî iki tahtânî beyti ve bir fevkānî beyti ve iki sofayı ve ahırı ve bi’r-i mâyı ve zât-ı eşcâr-ı müsmireyi hâvî muhavvatayı müştemil olun zevce-i mesfûre Ayşe Hâtun ile ale’l-iştirâki’s-seviy silk-i mülkümüzde olan menzilden nısf hisse-i şer‘iyye-i şâyi‘amı cümle-i tevâbi‘ ve levâhıkı ve âmme-i menâfi‘ ve merâfıkı ile zevcem mezbûre Ayşe Hâtun’a beş bin nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ kıldım ba‘de’l-yevm menzil-i mahdûd-ı mezkûrdan nısf hisse-i şâyi‘ası mezbûre Ayşe Hâtun’un mülk-i müşterâ-yı sarîhidir keyfe mâ yeşâ ve yahtâr mutasarrıfe olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini mezbûre Ayşe Hâtun bi’l-muvâcehe tasdîk edicek mâ hüve’l-vâki‘ [bi’t-taleb ketb olundu]. Hurrire fi’l-yevmi’s-sânî ve’l-ışrîn min Şevvâli’l-mükerrem li’s-seneti’l-mezbûre. Şuhûdü’l-hâl: Abdurrahman Efendi b. Ömer el-İmâm, Mustafa b. Abdullah el-Muhtesib, Sinan Halîfe b. Abdünnebi, Ömer b. Süleyman el-Mezârî, Hasan b. Abdullah el-Mezârî, Mustafa b. Abdullah er-Râcil, Rüstem Beşe b. Abdullah er-Râcil, Hüseyin b. Kubad, Seyyid b. Kubad, Mustafa b. Mehmed, Perviz b. Abdullah, Ali b. Abdullah ve gayruhüm mine’l-hâzırîn.