Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 387 Hüküm no: 500 Orijinal metin no: [85b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marola bt. Nikola’nın evini dârüssaâde ağası Hacı Mustafa Ağa b. Abdürrahim’e satması Kazâ-i Havâss-ı Aliyye’ye tâbi‘ Vidos nâm karye sâkinlerinden Marola bt. Nikola nâm nasrâniye meclis-i şer‘-i hatîr-i lâzımü’t-tevkīrde işbu hâfızü’l-kitâb atebe-i aliyye-i sultâniyyede sâbıkan Dârü’s-sa‘âde ağası olan iftihârü’l-havâs ve’l-mukarrebîn mu‘temedü’l-mülûk ve’s-selâtîn el-Hâc Mustafa Ağa b. Abdürrahim hazretleri taraf-ı âlîlerinden husûs-ı âti’z-zikri tasdîka vekîl olup vekâleti hasm-ı şer‘î-i câhid mahzarında Şaban Halîfe b. Derviş ve Zülfikār Bey b. Abdullah şehâdetleri ile sâbite olan Dergâh-ı âlî -dâme mahfûfen bi’l-me‘âlî- müteferrikalarından kıdvetü’l-emâcid ve’l-ekârim zübdetü’l-mehâmid ve’l-mekârim zü’l-kadri’l-celî Hasan Çelebi b. Ali mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafdan kiliseye ve bir tarafdan kasab Yorgi mülküne ve bir tarafdan bi’r-i mâya ve bir tarafdan tarîk-i âma müntehî iki tahtânî beyti ve fırını ve ahırı ve bir bâb dükkânı ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve âmme-i menâfi‘ ve merâfıkı [ile] on sekiz bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân menzil-i mahdûd bi cümleti’l-hudûd ve’l-hukūk müvekkil-i müşârün-ileyh hazretlerinin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini vekîl-i mûmâ-ileyh Hasan Çelebi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fî evâsıtı Ramazâni’l-mübârek li târihi’l-mezbûr. Şuhûdü’l-hâl: Fahrü’l-müderrisîn Mehmed Efendi b. ( ), fahrü’l-hutebâ Şaban Halîfe, Yusuf Çavuş b. ( ), Ahmed Efendi b. ( ) el-Kastamonî, el-Hâc Hamza b. ( ) el-Müezzin, Abdi Beşe b. ( ), Mustafa b. Mehmed.