Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 389 Hüküm no: 503 Orijinal metin no: [86a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Hıranda’nın varislerinin evlerini dârüssaâde ağası Hacı Mustafa Ağa b. Abdürrahim’e satıp tarlalarının da tasarruf haklarını devrettikleri Karye-i merkūme sâkinlerinden iken bundan akdem mürd olan Yorgi v. Hıranda nâm zimmînin verâseti zevce-i metrûkesi Komyani bt. Dimitri nâm nasrâniyeye ve sagīr evlâdı İstemad ve Aleksandra ve Vasilaki nâm zimmîlere münhasıra oldukdan sonra mezbûre Komyani kendi tarafından asâleten ve sagīrler tarafından vesâyeten meclis-i şer‘de vekîl-i müşârün-ileyh mahzarında ikrâr edip hâlik-i mezbûrun terekesinden karye-i merkūmede vâki‘ bir tarafdan Ayşe Hâtun bt. ( ) ve bir tarafdan Yani v. ( ) mülküne ve iki tarafdan tarîk-i âma müntehî iki tahtânî beyti ve ıstablı ve muhavvatayı ve hadîkayı müştemil olup bi hasebi’l-irsi’ş-şer‘î bize intikāl eden mülk menzilini sagīrûn-ı mezbûrûnun zarûret-i nafakaları ve hâlik-i mezbûrun zarûret-i deyni için ba‘de’l-müzâyedeti’ş-şer‘iyye müvekkil-i müşârün-ileyh Ağa hazretlerine bâtten on sekiz bin akçeye bey‘ edip kabz-ı semen ve teslîm-i mebî‘ eylediğimden sonra yine karye-i merkūme sınırı dâhilinde vâki‘ hâlik-i mezbûrdan sagīrûn-ı mezbûrûna intikāl eden mutasarrıf oldukları iki kıt‘a on iki keyl tohum istî‘âb eder tarlalarının dahi hakk-ı tasarrufunu müvekkil-i müşârün-ileyh Ağa’ya sâhib-i arz ma‘rifetiyle tefvîz edip mukābelesinde iki bin akçe kabz eyledim dedikde gıbbe’t-tasdîk bi’t-taleb ketb olundu. Hurrire li târihi’l-mezbûr. Şuhûdü’l-hâl: es-Sâbıkūn.