Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 390 Hüküm no: 505 Orijinal metin no: [86a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manol v. Kosta’nın ev ve bağını dârüssaâde ağası Hacı Mustafa Ağa b. Abdürrahim’e satması Karye-i merkūme sâkinlerinden Manol v. Kosta nâm zimmî asâleten ve li ebeveyn karındaşı Dimitri nâm sagīr tarafından vesâyeten meclis-i şer‘-i hatîr-i lâzımü’t-tevkīrde vekîl-i müşârün-ileyh mahzarında ikrâr edip karye-i mezbûrede vâki‘ bir tarafdan Yusuf Çavuş mülküne ve bir tarafdan Apostol v. ( ) mülküne ve iki tarafdan tarîk-i âma müntehî bir beyt-i süflîyi müştemil mülk menzilimi ve yine karye-i merkūme sınırında vâki‘ bir tarafdan Aleksi ve bir tarafdan Apostol ve bir tarafdan Panko bağlarına ve bir tarafdan taşlığa müntehî tahmînen yirmi ırgadlık bir kıt‘a mülk bağımı cümle-i tevâbi‘ ve levâhıkı ile bi safkatin vâhidetin müvekkil-i müşârün-ileyh hazretlerine yirmi beş bin akçeye bâtten bey‘ eyledim dedikde gıbbe’t-tasdîk ketb olundu. Li târihi’l-mezbûr. Şuhûdü’l-hâl: es-Sâbıkūn.