Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 390 Hüküm no: 506 Orijinal metin no: [86a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Manol’ün ev ve bağını dârüssaâde ağası Hacı Mustafa Ağa b. Abdürrahim’e satması Yine karye-i merkūme sâkinlerinden Dimitri v. Manol nâm zimmî meclis-i şer‘de müşârün-ileyh vekîl Hasan Çelebi mahzarında ikrâr edip karye-i merkūmede vâki‘ bir tarafdan Ayşe Hâtun mülküne ve iki tarafdan tarîk-i âma ve bir tarafdan Haydar b. Abdullah mülküne ve Rıdvan b. Abdullah mülklerine müntehî iki tahtânî beyti müştemil olan mülk menzilimi ve yine karye-i merkūme kurbunda vâki‘ bir tarafdan ılıca ve bir tarafdan Libye bt. ( ) ve bir tarafdan Yorgi v. ( ) ve bir tarafdan Kiryaki nâm zimmîler bağlarına müntehî tahmînen yirmi ırgadlık bir kıt‘a mülk bağımı bi safkatin vâhidetin müvekkil-i müşârün-ileyh el-Hâc Mustafa Ağa’ya yirmi beş bin akçeye bâtten bey‘ eyledim dedikde gıbbe’t-tasdîk ketb olundu. Hurrire li târihi’l-mezbûr. Şuhûdü’l-hâl: es-Sâbıkūn.