Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 391 Hüküm no: 508 Orijinal metin no: [86a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yakomi v. Todik’in bağını Korino v. Angeli’ye satması Vilâyet-i Rumeli’nde nefs-i kasaba-i Enez sâkinlerinden Yakomi v. Todik nâm zimmî mahfil-i kazâda işbu bâ‘isü’l-kitâb Korino v. Angeli muvâcehesinde bi’t-tav‘ ve’r-rızâ ikrâr ve takrîr-i kelâm edip kasaba-i mezbûrede bağları dâhilinde vâki‘ bir tarafdan Yakomi v. ( ) bağına ve bir tarafdan Vasilako v. Kosta bağına ve bir tarafdan Apokfo v. Kosta bağına ve bir tarafdan Tac v. Yani bağına müntehî beş dönüm bir kıt‘a mülk bağımı cümle-i tevâbi‘ ve levâhıkı ve âmme-i menâfi‘ ve merâfıkı ile merkūm Korino’ya altı bin nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu teslîm eyledim ba‘de’l-yevm zikr olunan mersûm Korino’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun bi vechi mübîn üzre cârî olan ikrâr ve takrîrini el-mukarru lehü’l-merkūm Korino bi’l-muvâcehe tasdîk edicek. Fi’t-târi[hi]’l-mezbûr. Şuhûdü’l-hâl: Mustafa [b.] Mehmed, Yakub [b.] Kurd, Perviz b. Abdullah, Ali b. Abdullah, Yanaki [v.] Dimitri, Mihal [v.] Yorgi, Maskalyo Reis, Duka v. Damol, Lozri [v.] Yani, Dimitri [v.] Yorgi ve gayruhüm mine’l-hâzırîn.