Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 392 Hüküm no: 510 Orijinal metin no: [86b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çelebi b. Mehmed’in ev, bağ yeri ve hayvanlarını Hacı Ahmed Efendi’ye satıp tarlasının da tasarruf hakkını devretmesi Mahmiye-i Kostantıniyye -humiyet ani’l-âfât ve’l-beliyye-de Yenibahçe kurbunda vâki‘ Müneccim Sadi mahallesi sâkinlerinden fahrü’l-akrân Hasan Çelebi b. Mehmed nâm râcil meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb fahrü’l-eimme el-Hâc Ahmed Efendi b. Yusuf nâm imâm mahzarında bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye kazâsı müzâfâtından Çatalca tevâbi‘inden Subaşı nâm karyede vâki‘ cevânib-i erba‘ası tarîk-i âma müntehî ve mahdûd taşdan mübtenî iki tahtânî beyti ve fırını ve bir bâb sundurmayı ve hayâtlı anbarı ve ıstablı ve bir odayı ve zât-ı eşcâr-ı müsmire ve gayr-ı müsmireyi hâvî cüneyneyi müştemil çiftlik demekle ma‘rûf menzilimi ve yine karye-i merkūme kurbunda vâki‘ bir tarafdan İbrahim Çelebi b. Kenan Hâce bağına ve bir tarafdan Kamer Hâtun bt. Abdullah bağına ve iki tarafdan tarîk-i âma müntehî bir kıt‘a harâbe mülk bağ yerimi ve üç re’s kara sığır öküzünü ve bir re’s kara sığır ineğini bi cümleti’t-tevâbi‘ ve’l-levâhık ve kâffeti’l-menâfi‘ ve’l-menâfi‘ mezbûr el-Hâc Ahmed’e bi safkatin vâhidetin yirmi altı bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ât-ı mahdûde eylediğimden sonra yine karye-i merkūme kurbunda vâki‘ her biri lede’l-ahâlî ma‘lûmü’l-hudûd mutasarrıf olduğum on kıt‘a tarlaların hakk-ı tasarrufunu sâhib-i arz ma‘rifetiyle tefvîz edip mukābele-i tefvîzde olan dört bin nakd-i mezbûrü’n-na‘t akçeyi merkūm el-Hâc Ahmed yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ler merkūm el-Hâc Ahmed’in mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufu merkūmundur, sâir emsâli tasarrufu gibi keyfe mâ yeşâ ve yahtâr mutasarrıf olsun dedikde gıbbe’t-tasdîk ketb olundu. Hurrire fî 25 min Şevvâli’l-mükerrem li târihi’l-mezbûr. Şuhûdü’l-hâl: Şeyh Musa b. Mustafa el-Hatîb bi câmi‘i Sinan Paşa, İsmail b. Hasan el-Hatîbü’l-hâssa, el-Hâc Ferhad b. Abdullah er-Râcil, Hüseyin b. Abdullah Ser-oda, Hasan Çavuş b. Ahmed, Mehmed Efendi b. Yusuf el-İmâm, İsa Beşe b. Abdullah er-Râcil, Cafer b. Abdullah, Mahmud b. Bayezid, Ahmed b. Halil, Hasan b. Abdullah, Ali Bey b. Mehmed.