Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 393 Hüküm no: 511 Orijinal metin no: [86b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Selime Hâtun bt. Abdullah’ın evi ile ahır hissesini azatlı kölesi Râziye bt. Abdullah’a satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından merhûm Baba Haydar mahallesinde sâkin Selime Hâtun bt. Abdullah tarafından vech-i âtî üzre ikrâra vekîl olup hasm-ı şer‘î-i câhid mahzarında bimâ hüve nehci’s-sübût şer‘an vekâleti sâbite olan zevci Ahmed Bey b. Mehmed nâm kimesne mahfil-i kazâda müvekkile-i mezbûrenin mu‘takası işbu hâmil[etü]’l-kitâb Râziye bt. Abdullah nâm hâtun muvâcehesinde bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan Emine Hâtun bt. ( ) mülküne ve iki tarafdan müvekkile-i mezbûre Selime Hâtun mülküne ve bir tarafdan tarîk-i âma müntehî bir fevkānî ve bir tahtânî beyti ve kenîfi müştemil mülk menzilini ve menzil-i mezbûra mülâsık mülk ahırdan selâse-i erbâ‘ı cümle-i tevâbi‘ ve levâhıkı ve âmme-i menâfi‘ ve merâfıkı ile mersûm Râziye’ye iki bin nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ kıldı ba‘de’l-yevm menzil-i mahdûd-ı mezkûr merkūme Râziye’nin mülk-i müşterâ-yı sarîhidir keyfe mâ yeşâ ve yahtâr mutasarrıfe olsun dedikde vekîl-i mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûre Râziye bi’l-muvâcehe tasdîk edicek gıbbe’t-taleb ketb olundu. Hurrire fî târihi’l-mezbûr. Şuhûdü’l-hâl: Ahmed Bey b. Rıdvan el-Cündî Fethullah b. Hüsrev el-Bevvâb, İlyas Çelebi b. Yakub el-Kâtib, İbrahim b. Bahtiyar, Mustafa b. Ahmed, Mehmed b. Ahmed, Ahmed b. Timur, Hasan b. Hüsrev, Davud b. Ahmed, Sevindik b. Ali, Mustafa b. Mehmed ve gayruhüm.