Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 400 Hüküm no: 521 Orijinal metin no: [88b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Piyo’nun ev, ev eşyası, bağ ve hayvanlarını Çelebioğlu Hüseyin’e satıp tarlasının da tasarruf hakkını devretmesi Vilâyet-i Rumeli’nde Paşa sancağında Opar kazâsına tâbi‘ Neclü? nâm karye sâkinlerinden Piyo v. (...) nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Çelebioğlu Hüseyin nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Mitro v. Pilo mülküne ve bir tarafdan Kiko v. Pime mülküne ve bir tarafdan Kirko v. Yani mülküne ve bir tarafdan Kika v. Vilate mülküne müntehî bir tahtânî beyti ve samanlığı ve bostan yerini müştemil olan mülk menzilimin ve menzil-i mezkûrda olan beynimizde ma‘lûm esâs-ı beyti ve seksen re’s koyundan ve bir çift kara sığır öküzünden ve bir re’s atdan ve bir re’s katırdan ve yine karye-i merkūme bağları dâhilinde vâki‘ lede’l-ahâlî ma‘lûmü’l-hudûd iki kıt‘a mülk bağlarımın rub‘unu cümle-i tevâbi‘ ve levâhıkı ile bi safkatin vâhidetin mezbûr Hüseyin’e iki bin akçeye bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eylediğimden sonra yine karye-i merkūme sınırı dâhilinde her biri lede’l-ahâlî ma‘lûmü’l-hudûd mutasarrıf olduğum on kıt‘a tarlaların dahi rub‘unun hakk-ı tasarrufunu sâhib-i arz ma‘rifetiyle merkūm Hüseyin’e tefvîz edip ol dahi minvâl-i muharrer üzre tefevvüz ve kabûl eylediğinden sonra mukābele-i tefvîzde olan bin nakid akçeyi bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ler merkūm Hüseyin’in mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufu merkūmundur, sâir emsâli tasarrufu gibi keyfe mâ yeşâ ve yahtâr mutasarrıf olsun dedikde gıbbe’t-tasdîk ketb olundu. Şuhûdü’l-hâl: Sinan b. Aydın, Sinan b. Abdullah, Mehmed b. Abdullah, Pimo v. Köni, Pimo v. Göka, Mitro v. Pini, Dado v. Kini, Pilo v. Pime.