Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 401 Hüküm no: 522 Orijinal metin no: [88b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Mustafa’ya cariyesi Zamâne bt. Abdullah’ı satmak için izin verilmesi Medîne-i Ebâ Eyyûb-i Ensârî’de bi’l-fi‘l za‘îmü’l-vakt olan fahrü’l-eşbâh Mehmed Bey b. Mustafa nâm cündî meclis-i şer‘-i hatîr-i lâzımü’t-tevkīrde sevk-i kelâm edip işbu hâzıre bi’l-meclis olan orta boylu gök gözlü sarışın Rûsiyyetü’l-asl Zamâne bt. Abdullah nâm câriye işbu sene tis‘a ve ışrîn ve elf Recebi’l-ferdi’nin yirmi beşinci gününde ibâk ettiğine ikrârı ile ahz ve yevmî altışar akçe nafaka takdîr olunduğu kayd-ı sicil olunmuş idi hâlâ kānûn-ı pâdişâhî ve hükm-i şehinşâhî üzre zikr olunan evsâf ile mevsûfe olan mezbûre Zamâne’nin müddet-i örfiyyesi tamâm olduğu ecilden kıbel-i şer‘den bey‘ olunması için izin taleb ederim dedikde fi’l-vâki‘ câriye-i mezbûrenin müddeti tamâm olduğu sicill-i mahfûza nazar olundukda zâhir ve mütebeyyin olmağın ber mûceb-i kānûn mezbûr Mehmed Bey’e mezbûre Zamâne’yi bey‘a kıbel-i şer‘den izin verilip işbu hurûf ber sebîli’t-temessük ketb olunup yed-i tâlibe def‘ ve vaz‘ olundu lede’l-ihtiyâc ibrâz ve ihticâc edine. Hurrire fî evâsıtı şehri Zilka‘deti’ş-şerîfe li sene tis‘a ve ışrîn ve elf. Şuhûdü’l-hâl: Mustafa b. Mehmed, Ali b. Abdullah, Yakub b. Kurd, Perviz b. Abdullah ve gayruhüm mine’l-hâzırîn.