Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 401 Hüküm no: 523 Orijinal metin no: [88b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şimo’nun kızları Aleksandri, Arkondi ve Afendirye’nin ortak evlerini Trandafil v. Yorgi’ye satmaları Havâss-ı Kostantıniyye kazâsı tevâbi‘inden Cuhûd-ı Burgaz nâm karye sâkinelerinden Aleksandri ve Arkondi ve Afendirye benât-ı Şimo nâm nasrâniyeler meclis-i şer‘de işbu hâmil-i hâze’l-kitâb Trandafil v. Yorgi nâm zimmî mahzarında her biri ikrâr edip karye-i merkūmede vâki‘ cevânib-i erba‘ası tarîk-i âm ile mahdûd bir tahtânî beyti ve sundurmayı ve zât-ı eşcâr-ı müsmire ve gayr-ı müsmireyi hâvî olup ale’l-iştirâki’s-seviy silk-i mülkümüzde münselik menzilimizi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Trandafil’e beş bin nakid akçeye bey‘-i bât ile bey‘ edip kabz-ı semen ve teslîm-i mebî‘ eyledik ba‘de’l-yevm menzil-i mezbûr merkūm Trandafil’in mülk-i müşterâ-yı sarîhidir keyfe mâ yeşâ mutasarrıf olsun dediklerinde mukırra-i mezbûrenin minvâl-i muharrer üzre cârî olan ikrâr ve takrîrlerini el-mukarru lehü’l-mezbûr Trandafil vicâhen ve şifâhen tasdîk ve tahkīk edicek gıbbe’t-taleb ketb olundu. Hurrire li târihi’l-mezbûr. Şuhûdü’l-hâl: Dimitri v. Manol, Yorgi v. Manol, Andriye v. Yorgi, Rika v. İstemad, Yani v. Aleksi, Mihal v. Toma, Andon v. Yani, Andriye v. Yani.