Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 402 Hüküm no: 524 Orijinal metin no: [88b-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Osman b. Mustafa’nın menzilini istiğlâl yoluyla Ahmed Bey Vakfı’na sattığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Câmi‘-i Kebîr mahallesinde sâkin olan el-Hâc Osman b. Mustafa nâm kimesne, âtiyyü’z-zikr menzilini merhûm Ahmed Bey vakfı’na mütevellî olan hâmil-i hâze’l-kitâb Keyvan Bey b. Abdullah’a bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla mezbûr Osman’ın işbu akdin kendilerinden sudûruna kadar sâhibi ve mâliki olduğu elinde ve taht-ı tasarrufunda bulundurduğu mahalle-i mezbûrede vâki‘ bir tarafdan merhûm …? Ağa vakfı, diğer tarafdan Kamer Hâtun vakfı, diğer iki tarafdan da tarîk-i âm ve tarîk-i hâs ile mahdûd menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt yirmi bin akçe-i Osmânî semen-i mu‘ayyen-i makbûzla iştirâ etti. Bâyi‘-i mezbûrun menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, zeyl-i kitâbda mezkûr ayın gurresinden bir sene tamâmına üç bin akçe ücret-i kirâ mukābilinde menzil-i merkūmu icâreye verdi. Mütevellî-i merkūm, vâki‘ ikrârı vicâhen ve şifâhen tasdîk etti. Cerâ zâlike ve hurrire fi’l-yevmi’l-hâmis min Zilka‘deti’ş-şerîfe sene tis‘a ve ışrîn ve elf. Şuhûdü’l-hâl: Şeyh Nasrullah Efendi b. merhûm Şeyh Ömer Efendi, Bayram Efendi b. Şükrullah Hatîb, Ali Ağa b. Abdülmennân, el-Hâc Mehmed b. Abdullah, Mehmed Çelebi b. el-Hâc Hüseyin, Abdülhâdî Halîfe b. Hamdi el-İmâm, Mustafa b. Mehmed el-Muhzır ve gayruhüm mine’l-hâzırîn.