Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 405 Hüküm no: 532 Orijinal metin no: [89b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Halîfe b. Şaban’ın Mustafa Çelebi Vakfı’na borcunu ödemesi Medîne-i Ebâ Eyyûb-i Ensârî -râdiye anhu Rabbühü’l-Bârî-’de vâki‘ merhûm ve mağfûrun-leh Mustafa Çelebi vakfı’na bi’l-fi‘l mütevellî olan el-Hâc Receb b. Yunus nâm kimesne meclis-i şer‘-i hatîr-i lâzımü’t-tevkīrde Ali Halîfe b. Şaban nâm kimesneyi ihzâr ve üzerine takrîr-i da‘vâ edip mezbûr Ali Halîfe zimmetinde mütevellî-i sâbık Mehmed b. Şaban nâm bevvâb-ı sultânî yedi ile beş yüz akçe ve benim yedim ile bin akçe asl-ı mâl ve yüz akçe mu‘âmele-i şer‘iyyeden cem‘an bin altı yüz akçe olup dokuz yüz akçesin edâ edip yedi yüz akçe zimmetinde bâkī kalmışdır suâl olunup ihkāk-ı hak olunmasın taleb ederim dedikde gıbbe’s-suâl merkūm Ali Halîfe cevâbında fi’l-hakīka mezbûr el-Hâc Receb’den bin akçe karz-ı şer‘î ahz edip mu‘âmele-i şer‘iyye ile vakfa akçe almadım ve meblağ-ı mezbûr bin akçeyi bi’t-tamâm edâ ve îfâ eyledim ve mütevellî-i sâbık mezbûr Mehmed’den aldığım beş yüz akçe ulûfem içindir vakfa deynim olmak üzre değildir deyû mukaddemâ zikr olunan beş yüz akçe vakfa deyn olduğunu münkir olıcak mezbûr Receb’den sıdk-ı kelâmını mübeyyine beyyine taleb olundukda zikr olunan beş yüz akçe asl-ı mâl-ı vakıfdan olup cânib-i vakfa merkūm Ali Halîfe’nin deyni olduğuna Ahmed Çelebi b. İbrahim ve Veli b. Abdullah nâm kimesneler şehâdet-i şer‘iyye ettiklerinden sonra meblağ-ı mezbûr bin akçe mu‘âmele-i şer‘iyye olunduğuna dahi mezbûr el-Hâc Receb’den beyyine taleb olundukda isbât-ı beyyineden izhâr-ı acz edip istihlâf ettikde mezbûr Ali Halîfe dahi nükûl edip nükûlü ile yüz akçe mu‘âmele dahi cânib-i vakfa edâya tenbîh olundukdan sonra merkūm el-Hâc Receb’in inkâr eylediği yüz akçe için mezbûr Ali Halîfe’den beyyine taleb olundukda ityân-ı beyyineden âciz olup istihlâf ettiğinde dokuz yüz akçeden ziyâde bir akçe ve bir habbe almadım deyû yemîn billâhi’l-aliyyi’l-a‘lâ [etmeğin] merkūm Ali Halîfe’nin zimmetinde vakf-ı merkūm için cem‘an yedi yüz akçe zâhir olıcak edâsına tenbîh olunup mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-hâmis min Zilka‘deti’ş-şerîfe li târihi’l-mezbûr. Şuhûdü’l-hâl: Elmas Ağa b. Abdullah, Mustafa b. Mehmed, Yakub b. Kurd, Ali b. Abdullah, Perviz b. Abdullah ve gayruhüm mine’l-hâzırîn.