Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 406 Hüküm no: 533 Orijinal metin no: [89b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstasniyo v. Petro’nun bağ hissesini Yorgi v. Niko’ya satıp tarlasının da tasarruf hakkını devretmesi Vilâyet-i Rumeli’nde Mora sancağında Polimuç kazâsına tâbi‘ Poriçani nâm karye sâkinlerinden İstasniyo v. Petro nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yorgi v. Niko nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme bağları dâhilinde vâki‘ bir tarafdan Dimo v. Harekâh bağına ve bir tarafdan cebele ve bir tarafdan vâdiye müntehî tahmînen beş dönüm mülk bağdan nısf hisse-i şâyi‘amı ve yine karye-i merkūmede vâki‘ bir buçuk dip dut ağacını, cümle-i tevâbi‘iyle bi safkatin vâhidetin iki bin nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip sâlifü’l-beyân mebî‘leri mahallinde kabza müşterî-i merkūmu taslît eylediğimden sonra yine karye-i merkūme sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd mutasarrıf olduğum bir kıt‘a tarlanın dahi hakk-ı tasarrufunu sâhib-i arz ma‘rifetiyle merkūm Yorgi’ye tefvîz edip mukābelesinde olan beş yüz nakd-i mezbûrü’n-na‘t akçeyi merkūm Yorgi yedinden bi’t-tamâm ahz ve kabz eyledim ba‘de’l-yevm sâlifü’l-beyân mebî‘ât merkūm Yorgi’nin mülk-i müşterâsıdır ve mârrü’z-zikr bir kıt‘a tarlanın dahi hakk-ı tasarrufu merkūmundur dedikde gıbbe’t-tasdîk ketb olundu. Hurrire fi’l-yevmi’s-sâlis aşer li târihi’l-mezbûr. Şuhûdü’l-hâl: Vasil v. Yorgi, Anastaş v. Papaniyot, Ergiri v. Yani, Dimitri v. Kosta, Yorgi v. Yani, Anderon v. Yani, Papanini v. ( ).