Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 112 Hüküm no: 87 Orijinal metin no: [13a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem Hatun bt. Hacı Perviz’in çiftliğini Hacı Yusuf Bey b. Hasan’a sattığı Mahmiye-i Galata müzâfâtından kasaba-i Tophâne’de Hendekbaşı mahallesinde sâkine fahrü’l-muhadderât Meryem Hâtun bt. el-Hâc Perviz tarafından husûs-ı âti’z-zikre vekîl olup hasm-ı câhid mahzarında nehc-i şer‘î üzre vekâleti sâbite olan fahrü’l-akrân Hâfız Yusuf Ağa b. Abdülmennân mahfil-i kazâda işbu sâhibü’l-kitâb el-Hâc Yusuf Bey b. Hasan mahzarında bi’l-vekâle ikrâr ve takrîr-i kelâm edip müvekkile-i mezbûrenin Havâss-ı Refî‘a kazâsı müzâfâtından Terkos nâhiyesine tâbi‘ Çilingir nâm karyede vâki‘ bir tarafı kâtib Mustafa Çelebi mülkü ve bir tarafı Ali Beşe b. Cafer mülkü ve bir tarafı karye-i merkūme mer‘âsı ve bir tarafı tarîk-i âm ile mahdûd ve bir bâb tahtânî odayı ve sundurmayı ve bir odalı ahırı ve muhavvata-i zât-ı eşcâr-ı müsmire-i mütenevvi‘ayı müştemil çiftlik ta‘bîr olunur mülk menzilini ve çiftlik-i mezbûrda mevcûd olan dört re’s kara sığır öküzünü ve sekiz re’s kara sığır ineğini ve üç buzağıyı ve üç kıt‘a arabayı ve der-anbar üç müd buğday ve üç müd alef ve üç araba samanı ve on dört kaz ve yedi ördek ve otuz tavuğu ve eski saban demirini ve mükemmel âlât ve esbâbı ile bir pulluğu ve beynimizde ilm-i şer‘î ile ma‘lûm olan sâir âlât-ı zirâ‘at ve esbâb-ı hırâsetini ve karye-i mezbûre sınırında vâki‘ lede’l-ahâlî ve’l-cîrân ma‘lûmü’l-hudûd olan bir kıt‘a mülk bağını vekâletim hasebiyle mezbûr el-Hâc Yusuf Bey’e kırk beş bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile bey‘ ve teslîm edip ol dahi vech-i muharrer üzre iştirâ ve tesellüm eyledikden sonra kadîmden çiftlik-i mezbûr ile tasarruf olunur karye-i merkūme sınırında vâki‘ sâhibü’l-me‘ârek ve’l-megāzî Ebü’l-feth Sultan Mehmed Hân-ı Gāzî evkāfı arâzisinden olup bir tarafdan Mehmed Ağa tarlası ve bir tarafdan Sinan Ağa tarlası ve bir tarafdan tarîk-i âm ile mahdûd bir kıt‘a tarla ve yine tarafeynden kâtib Mustafa Çelebi tarlası ve tarafeynden karye-i mezbûre mer‘âsı ile mahdûd bir kıt‘a tarla ve yine bir tarafdan Süleyman Beşe çayırı ve bir tarafdan Ahmed Beşe çayırı ve tarafeynden İbrahim Çelebi tarlası ile mahdûd bir kıt‘a tarla ve yine bir tarafdan Sefer ağa çayırı ve bir tarafdan Mehmed Ağa tarlası ve bir tarafdan Zülfikār Ağa tarlası ve bir tarafdan Halil Beşe tarlası ile mahdûd bir kıt‘a tarla ve yine bir tarafdan Abdülbâkī Çelebi köprüsü ve bir tarafdan Müezzinoğlu tarlası ve bir tarafdan bî-zebân Çingene tarlası ve bir tarafdan tarîk-i âm ile mahdûd bir kıt‘a tarla ve yine karye-i mezbûre arâzisinde lede’l-cîrân ma‘lûmü’l-hudûd olan bir kıt‘a tarlalarının dahi hakk-ı tasarruflarını, evkāf-ı mezbûre mütevellîsi ma‘rifetiyle mezbûr el-Hâc Yusuf Bey’e mezbûrü’n-na‘t beş bin akçe mukābelesinde vekâletimiz hasebiyle tefvîz edip ol dahi tefevvuz ve kabûl eyledikden sonra semeni mezbûr kırk bin akçe ile bedel-i tefvîz olan beş bin akçe ki cem‘an elli bin akçe eder meblağ-ı mezbûru nâhiye-i merkūmeye tâbi‘ Tilkiköyü demekle ma‘rûfe karyede vâki‘ müvekkile-i mezbûreye merkūm el-Hâc Yusuf Bey’den yüz yirmi bin akçeye vekâleten iştirâ elediğimiz çiftlik semeninden müvekkile-i merkūme zimmetinde olan elli bin akçe deynine vekâletim hasebiyle takās eyledim ba‘de’l-yevm emlâk-i mezbûre merkūm el-Hâc Yusuf Bey’in mülk-i müşterâsı ve mezâri‘-i mezbûre dâhil-i taht-ı tasarrufu olmuşdur, keyfe mâ yeşâ’ mutasarrıf olsun dedikde mukırr-ı mezbûrun bi’l-vekâle cârî olan ikrârını el-mukarru lehü’l-merkūm Yusuf Bey vicâhen tasdîk etmeğin mâ vaka‘a gıbbe’t-taleb ketb olundu. Târihuhü’l-mezbûr. Şuhûdü’l-hâl: Es-Sâbikūn.