Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 114 Hüküm no: 90 Orijinal metin no: [13b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andriye v. Şimo ve Kotinoş v. Yorgi arasındaki alacak davası Havâss-ı Aliyye kazâsı müzâfâtından Çatalca nâhiyesine tâbi‘ Üçerkulaklı nâm karye sâkinlerinden Andriye v. Şimo nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Kotinoş v. Yorgi nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Kirici nâm zimmî mülkü ve bir tarafdan İskarlet mülkü ve iki tarafdan tarîk-i âm ile mahdûd olan bir bâb tahtânî mülk menzilimi ve yine karye-i mezbûrede vâki‘ bir tarafdan Duka mülkü ve bir tarafdan Kiryazi mülkü ve iki tarafdan tarîk-i âm ile mahdûd bir kıt‘a mülk bahçemi ve yine karye-i mezbûre sınırında vâki‘ bir tarafdan Duka tarlası ve bir tarafdan Dimitri tarlası ve iki tarafdan tarîk-i âm ile mahdûd biribirine muttasıl iki kıt‘a tahmînen on dönüm mülk bağ yerini, târihi kitâbdan otuz sene mukaddem mezbûr Kotinoş’un babası mezbûr Yorgi’ye fıddî nakd-i râyic fi’l-vakt beş bin yedi yüz akçeye bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semeni olan meblağ-ı mezbûr beş bin yedi yüz akçeden dört bin altı yüz akçesin mezbûr Yorgi yedinden ahz ve kabz edip bâkī zimmetinde dokuz yüz akçe hakkım kalmış idi, hâlâ mezbûr Kotinoş’dan taleb eylediğimde beynimizde münâza‘ât-ı kesîre ve muhâsamât-ı adîde vâkı‘a olmuşidi el-hâletü hâzihî muslihûn tavassut edip mâbeynimizi beş yüz elli akçeye sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr beş yüz elli akçeyi mezbûr Kotinoş yedinden tamâmen alıp kabz eyledim ba‘de’l-yevm husûs-ı mezbûra müte‘allik da‘vâ ve nizâ‘ım kalmamışdır dedikde gıbbe’t-tasdîki’ş-şer‘î mâ vaka‘a gıbbe’t-taleb ketb olundu. Tahrîren fi’l-yevmi’s-sâlis min Cemâziyelevvel li sene seb‘a ve erba‘în ve elf. Şuhûdü’l-hâl: Mustafa Çelebi b. ( ), Mustafa Beşe Mahmud, Ali b. Mustafa, Mustafa b. Veli, Yorgi [v.] Nikola, Dimo [v.] Pavlo, Dimitri [v.] Pavlo, Şimo [v.] Pavlo, Yani v. Duko, Kiryazi [v.] Dimitri, Angilaki [v.] Duka, Yorgi [v.] Argilidi ve gayruhüm.