Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 115 Hüküm no: 91 Orijinal metin no: [13b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aşçıbaşı Mescidi Vakfı’na mütevelli olan Abdullah Halîfe b. Maden’in Vakfın alacaklarını tahsil ettiği Medîne-i Hazret-i Ebî Eyyûb el-Ensârî’de vâki‘ merhûm Aşçıbaşı mescid-i şerîfinin evkāf-ı müteferrikasına mütevellî iken fevt olan Turgud Halîfe mahlûlünden berât-ı pâdişâhî ile hâlâ mütevellî olan Abdullah Halîfe b. Maden mahfil-i kazâda müteveffâ-yı merhûmun sulbiye sagīre kızı ve vârisesi olan Fâtıma nâm hâtun tarafından ikrâr-ı âti’z-zikri ikrâra vekîl olup vekâleti merkūme Fâtıma’yı ma‘rifet-i şer‘iyye ile ârifeyn olan İshak Çelebi b. ( ) el-İmâm ve Şaban Halîfe b. Kenan nâm kimesne şehâdetleri ile sâbite olan fahrü’l-kuzât Hasan Efendi b. Sefer ve li ebeveyn karındaşı oğlu ve vârisi olan İsmail Çelebi b. Ahmed muvâcehesinde bi’t-tav‘ ikrâr ve i‘tirâf edip mescid-i merkūmun evkāf-ı müteferrikası olan cem‘an otuz dokuz bin akçeden yirmi üç bin akçe defter-i vakf mûcebince zimem-i nâsdan ve on üç bin akçe müteveffâ-yı merkūmun muhallefâtından vârisleri merkūme Fâtıma ve merkūm İsmail yedlerinden alıp cem‘an otuz altı bin akçe kabz eyledim dedikde mütevellî-i merkūm Abdullah Halîfe’nin ikrâr-ı meşrûhunu merkūm İsmail asâleten ve vekîl-i merkūm Hasan Efendi vekâleten vicâhen ve şifâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’r-râbi‘ min Cumâdelâhire li sene seb‘a ve erba‘în ve elf. Şuhûdü’l-hâl: Veli efendi b. Abdünnebi, İshak Çelebi el-İmâm, Şaban Halîfe b. Kenan, Mehmed b. Hasan ve gayruhüm.