Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 117 Hüküm no: 93 Orijinal metin no: [14a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yamandi v. İstadi’nin evini istiğlâl yoluyla Hüseyin Bey Vakfı’na sattığı Mahmiye-i Kostantıniyye mahallâtından Çakır Ağa mahallesinde sâkin olan Yamandi v. İstadi nâm zimmî meclis-i şer‘-i şerîfde hâzır olup âtiyyü’z-zikr menzilini merhûm Hüseyin Bey vakfı’na mütevellî olan hâmil-i hâze’l-kitâb Sinan Efendi b. Mustafa’ya bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla, zimmî-i mezbûrun işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i merkūmede kâin bulunan ve bir tarafdan Safyana mülkü, diğer tarafdan Ezmerağda mülkü ve iki tarafdan da tarîk-i âm ile mahdûd olan cemî‘-i menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt on bin akçe semen-i mu‘ayyen-i makbûzla ondan iştirâ etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr târihden üç sene tamâmına üç bin akçe ücret ile menzil-i mezbûru kirâya verdi. Mütevellî-i mezbûr, vâki‘ ikrârı vicâhen ve şifâhen tasdîk etti. Sonra Dimitri v. Pavlo ve Polihroni v. Kosta ve Hristo Debraki v. Mihayil nâm zimmîlerin her biri menzil-i mezbûrun derkine ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’r-râbi‘ min Cemâziyelâhir sene seb‘a ve erba‘în ve elf. Şuhûdü’l-hâl: Mustafa Çelebi b. Ramazan, Mehmed Çelebi b. Pîrî, Mustafa b. Yusuf, müezzin Murtaza Halîfe b. Mehmed, Hüseyin Çelebi b. Abdi, Şeyhî Çelebi b. Hüseyin ve gayruhüm