Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 117 Hüküm no: 94 Orijinal metin no: [14a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kemel v. Yakob’un alacak davasının reddi Havâss-ı Aliyye kazâsı müzâfâtından Hasköy’de sâkin Kemel v. Yakob nâm Yahudi meclis-i şer‘a râfi‘ü’l-kitâb İstati v. İstemad nâm zimmîyi ihzâr ve mahzarında üzerine takrîr-i da‘vâ edip beş sene mukaddem mezbûr İstati’den iki bin akçe kıymetli bir meneviş çuka muvahhidî kebûd kürk ferâceyi rehin vaz‘ edip meblağ-ı mezbûr iki bin akçeden bin iki yüz akçesin mukaddemâ mezbûr İstati’ye edâ ve teslîm edip hâlâ zimmetimde sekiz yüz akçesi kalmışdır rehin vaz‘ eylediğim ferâceyi ihzâr eylesin sekiz yüz akçesin dahi edâ edeyim dedikde gıbbe’s-suâl mezbûr İstati husûs-ı mezbûru bi’l-külliye inkâr edicek müdde‘î-i mezbûr Kemel’den müdde‘âsına mutâbık beyyine taleb olunup mehil-i şer‘î imhâl olundukdan sonra ityân-ı beyyineden âciz olup istihlâf etmeğin mezbûr Kemel yedinden vech-i meşrûh üzre kürklü ferâce rehin alıp ve iki bin akçe karz vermediğine mezbûr İstati’ye yemîn teklîf olundukda alâ vefki’l-mes’ûl yemîn billâhi’llezî enzele’l-İncîle alâ İsâ -a.m.- etmeğin mezbûr Kemel ol vechile mu‘ârazadan men‘ olunup mâ vaka‘a gıbbe’t-taleb ketb olunup mâ vaka‘a gıbbe’t-taleb ketb olundu. Tahrîren fi’l-yevmi’r-râbi‘ min Cemâziyelevvel târihi’l-mezbûr. Şuhûdü’l-hâl: Bâli Beşe b. Abdullah, Hüseyin Beşe b. Osman, Mustafa b. Mahmud Çukadâr, Safyanoz v. Kiryako, Avram v. Dimitri ve gayruhüm.