Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 119 Hüküm no: 98 Orijinal metin no: [14b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sava v. Papa Yani ve Anastaş v. Yorgi arasında anlaşmazlık olması Havâss-ı Refî‘a müzâfâtından Çatalca kasabası mahallâtından Ayayorgi mahallesi sükkânından Sava v. Papa Yani ve li ebeveyn karındaşı Anastaş nâm zimmîler asâleten ve li ebeveyn kız karındaşları Vasilaki ve Arti zimmîler taraflarından ikrâr-ı âti’z-zikre vekîl olup vekâleti ( ) şehâdetleri ile sâbite olan merkūm Sava vekâ leten mahfil-i kazâda râfi‘ü hâze’l-kitâb Anastaş v. Yorgi muvâcehesinde vekâleten ikrâr ve i‘tirâf edip bundan akdem mürd olan babamız merkūm Papa Yani’nin muhallefâtından mahalle-i mezbûrede vâki‘ bir tarafdan Mihal v. Yorgi mülkü ve bir tarafdan Dimitri [v.] Todori mülkü ve bir tarafdan kilise ve taraf-ı râbi‘den tarîk-i âm ile mahdûd hâlâ merkūm Anastaş tasarrufunda olan menzili da‘vâ ve taleb eylediğimizde mezbûr Anastaş târih-i kitâbdan yirmi dört sene mukaddem karındaşım Dimitri nâm zimmî babanızdan sekiz bin akçeye iştirâ edip ba‘dehû helâk olmağla bana intikāl eyledi mülk-i mezbûr mûrisimizdir deyû cevâb vermeğin beynimizde münâza‘ât-ı kesîre ve muhâsamât-ı şedîde ve ekîde vâki‘ olmuşidi el-hâletü hâzihî muslihûn tavassut edip mâbeynimizi bin iki yüz akçe üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı merkūm bin iki yüz akçeyi merkūm Anastaş yedinden bi tamâmihî alıp kabz edip zikr olunan menzil da‘vâsından zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik. Ba‘de’l-yevm bizden bi’l-asâle veya vekîlimizden bi’l-vekâle da‘vâ ve taleb sudûr ederse lede’l-hükkâmi’l-kirâm mesmû‘a olmaya dediklerinde mukırrân-ı merkūmân Sava ve Anastaş asâleten ve vekâleten cârî olan ikrâr-ı meşrûhlarını merkūm Anastaş vicâhen tasdîk edicek mâ vaka‘a ketb olundu. Târihuhü’l-mezbûr. Şuhûdü’l-hâl: Es-Sâbikūn.