Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 120 Hüküm no: 99 Orijinal metin no: [14b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kerime bt. Mustafa’nın mirasından Sâliha Hatun’un hakkını aldığı Husûs-ı âti’z-zikrin mahallinde tahrîri iltimâs olunmağla savb-ı şer‘-i kavîmden mevlânâ Mustafa Efendi irsâl olunup ol dahi medîne-i Hazret-i Ebî Eyyûb el-Ensârî mahallâtından Takyecibaşı mahallesi sükkânından fahrü’l-akrân Hüseyin Efendi b. Abdullah menziline varıp akd-i meclis-i şer‘-i mübîn eyledikde merkūm Hüseyin Efendi zevcesi olup bundan akdem fevt olan Kerime bt. Mustafa nâm müteveffânın verâseti zevc-i metrûkü merkūm Hüseyin Efendi ve li ebeveyn halası Sâliha nâm hâtuna münhasıra olduğu şer‘an mütebeyyin oldukdan sonra mezbûre Sâliha Hâtun mahfil-i kazâda mezbûr Hüseyin Efendi muvâcehesinde bi tav‘ihâ ikrâr ve i‘tirâf edip kız karındaşım kızı müteveffât-ı mezbûre Kerime Hâtun’un [15a] cemî‘ metrûkât ve emlâkinden bi hasebi’l-irsi’ş-şer‘î bana isâbet eden nısf hisse-i şer‘iyyem mukābelesinde cem‘an yirmi üç bin sekiz yüz akçe alâ tarîki’t-tehârüci’ş-şer‘î mezbûr Hüseyin Efendi yedinden ahz ve kabz eyledim ba‘de’l-yevm kız karındaşım kızı müteveffât-ı mezbûre Kerime’nin muhallefâtına müte‘allik da‘vâ nizâ‘dan mezbûr Hüseyin Efendi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim benden bi’l-asâle veya vekîlimden bi’l-vekâle da‘vâ ve taleb sudûr ederse lede’l-hükkâmi’l-kirâm mesmû‘a ve makbûle olmasın dedikde mukırra-i merkūme Sâliha Hâtun’un ikrâr-ı meşrûhunu el-mukarru lehü’l-merkūm Hüseyin Efendi vicâhen ve şifâhen tasd[îk] edicek mâ vaka‘a gıbbe’t-taleb ketb olundu. Hurrire fi’l-yevmi’s-sâlis min Cumâdelâhire li sene seb‘a ve erba‘în ve elf. Şuhûdü’l-hâl: İshak Çelebi el-İmâm, Aziz Çelebi el-Müezzin, Ahmed Çelebi el-Kayyım, Hüseyin Çelebi b. Şaban, üstâd Mustafa b. Mehmed, Ramazan b. Durmuş, Mehmed Çelebi b. Abdi, Mehmed Çelebi b. Mustafa, Mustafa Halîfe b. Yusuf, Mustafa Bey b. Abdullah, Şaban b. Hüseyin.