Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 121 Hüküm no: 100 Orijinal metin no: [15a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Minos v. Androni’nin evini istiğlâl yoluyla Ömer Efendi Vakfı’na sattığı Mahmiye-i Kostantıniyye sur kapılarından dâhil-i bâb-ı Ebî Eyyûb el-Ensârî’de vâki‘ olan Mustafa Paşa mahallesinde sâkin olan Minos v. Androni nâm zimmî, âtiyyü’z-zikr menzilini, merhûm Ömer Efendi vakfı’na mütevellî olan hâmil-i hâze’l-kitâb Abdullah Halîfe b. Maden’e bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla, zimmî-i mezbûrun işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i merkūmede kâin bulunan ve bir tarafdan Digomi mülkü, diğer tarafdan Dimitri mülkü, öteki tarafdan Hristodlo mülkü ve diğer tarafdan da tarîk-i âm ile mahdûd bulunan cemî‘-i menzilini cümle tevâbi‘ ve levâhıkı ile râyicü’l-vakt altı bin akçe semen-i mu‘ayyen-i makbûzla ondan iştirâ etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr ayın gurresinden üç sene tamâmına iki bin dokuz yüz akçe ücret ile menzil-i mezbûru kirâya verdi. Mütevellî-i mezbûr, vâki‘ ikrârı vicâhen ve şifâhen tasdîk etti. Sonra Duka v. Fatoki nâm zimmî, menzil-i mezbûrun derkine ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’l-hâmis min Cumâdelâhire sene seb‘a ve erba‘în ve elf. Şuhûdü’l-hâl: İmâm Hasan Efendi b. Abdi, Seyyid Mehmed b. Seyyid Mehmed, İsmail, el-Hâc İbrahim b. ( ), Cafer b. Abdullah ve gayruhüm