Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 122 Hüküm no: 102 Orijinal metin no: [15a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manisalı Mehmed Paşa Vakfı’na ait dükkan arsasının Emine Hatun’a satılması A‘lemü’l-ulemâ’i’l-izâm efdalü’l-fuzalâ’i’l-fihâm yenbû‘ü’l-fezâ’il ve’l-me‘âlî, metbû‘ü’l-efâzıl ve’l-e‘âlî Şakrâvî Abdürrahim Efendi hazretlerinin necl-i necîb ve nesl-i edîbleri iftihârü’l-müderrisîni’l-kirâm, muhtârü’l-muhakkikīni’l-fihâm, zü’l-cenneti’s-senâ ve’l-beyti’s-semâ? Ebussuûd Mehmed Efendi hazretlerinin taraf-ı karînü’ş-şereflerinden tefvîz-i âti’z-zikri ikrâra vekîl olup vekâleti Ali Efendi b. İbrahim el-İmâm ve Ahmed Halîfe b. İbrahim el-Müezzin şehâdetleriyle sâbite olan Mehmed Efendi et-Tabîb mahfil-i kazâda râfi‘at-i hâze’l-kitâb Emine Hâtun bt. ( ) tarafından ikrâr-ı âti’z-zikri tasdîka vekîl olup vekâleti mezbûre Emine Hâtun’u ma‘rifet-i şer‘iyye ile ârifeyn olan şâhideyn-i merkūmeyn şehâdetleri ile sâbite olan Osman Bey b. Abdülganî el-Yesârî mahzarında bi’l-vekâle ikrâr ve i‘tirâf edip müvekkilem müşârün-ileyh efendi hazretlerinin işbu tefvîz sudûruna değin taht-ı tasarrufunda olup mahmiye-i Kostantıniyye -hamâhallâhu te‘âlâ ani’l-beliyye-de Çukurhamam kurbunda Kepekçiler çarşısında vâki‘ Manisalı merhûm Mehmed Paşa vakfı’ndan olup vakf-ı merkūma beher sene yüz akçe mukāta‘ası olan üç bâb dükkân arsasını merkūme Emine Hâtun’a altı bin akçe bedele tefvîz ve mütevellî yedinden bedel-i tefvîz olan meblağ-ı merkūm altı bin akçeyi bi tamâmihî alıp kabz eylediler. Ba‘de’l-yevm arsa-i merkūme mezbûre Emine Hâtun’un dâhil-i taht-ı tasarrufu olmuşdur, keyfe mâ teşâ’ ve tahtâr mutasarrıfa olup murâd eylediği üzre binâ eylesin dedikde vekîl-i merkūm Mehmed Efendi’nin ikrâr-ı meşrûhunu vekîl-i âhar merkūm Osman Bey bi’l-vekâle vicâhen ve şifâhen tasdîk ve tahkīk edicek mâ hüve’l-vâki‘ gıbbe[’t-taleb] ketb olundu. Hurrire fi’l-yevmi’s-sâbi‘ min Cemâziyelevvel li sene seb‘a ve erba‘în ve elf. Şuhûdü’l-hâl: Mustafa Efendi b. Mehmed el-İmâm, Rüstem Halîfe b. Abdullah el-İmâm, Ali Efendi b. İbrahim, Ahmed Halîfe b. İbrahim el-Müezzin, İbrahim, Hasan Beşe b. Abdullah er-Râcil, Yakub b. Kurd, Cafer b. Abdullah, Mahmud b. Ahmed ve gayruhüm.