Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 123 Hüküm no: 104 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mümine bt. Ahmed Çavuş’un iki dükkanı Ömer Çelebi b. İlyas’a sattığı Mahmiye-i İstanbul’da ( ) mahallesinde sâkin olup bundan akdem vefât eden merhûm Osman Bey b. Abdullah nâm kimesnenin verâseti zevce-i metrûkesi Mümine bt. Ahmed Çavuş nâm hâtun ile sulbî oğlu Pîr Mehmed Çelebi’ye münhasıra olup kable’l-kısme merkūm Pîr Mehmed Çelebi dahi vefât edip kezâlik verâseti vâlidesi merkūme Mümine Hâtun’a münhasıra olduğu şer‘an mütebeyyin oldukdan sonra mezbûre Mümine Hâtun mahfil-i kazâda işbu sâhibü’l-kitâb Ömer Çelebi b. İlyas nâm râcil mahzarında ikrâr ve i‘tirâfa edip medîne-i Hazret-i Ebî Eyyûb el-Ensârî kurbunda Topçular nâm karyede vâki‘ müteveffiyân-ı mezbûrândan bi hükmi’l-münâsaha şer‘an bana intikāl edip arsasının hazret-i müşârün-ileyh vakfına senevî yirmi akçe mukāta‘ası olup bir tarafı Davud Paşazâde dükkânı ve iki tarafı mekābir-i müslimîn ve bir tarafı tarîk-i âm ile mahdûd ve birbirine muttasıl bir bâb berber ve bir bâb mülk bakkal dükkânlarını mezbûr Ömer Çelebi’ye safka-i vâhide ile tarafeynden îcâb ve kabûlü hâvî bey‘-i bâtt-ı sahîh-i şer‘i ile otuz bin nakd-i râyic fi’l-vakt fıddî akçeye bey‘ ve teslîm edip ol dahi iştirâ ve tesellüm eyledikden sonra semeni olan meblağ-ı merkūm otuz bin akçeyi yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan dükkânlar merkūm Ömer Çelebi’nin mülk-i müşterâsıdır, keyfe mâ yeşâ’ ve tahtâr mutasarrıf olsun dediklerinde gıbbe’t-tasdîki’ş-şer‘iyyi vicâhen mâ vaka‘a bi’t-taleb ketb olundu. Fi’l-yevmi’s-sâmin min Cumâdelâhire li sene seb‘a ve erba‘în ve elf. Şuhûdü’l-hâl: Es-Sâbikūn.