Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 124 Hüküm no: 105 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kerime bt. Tevekkül’ün boşandığı kocasında alacağının kalmadığı Havâss-ı Aliyye kazâsına tâbi‘ Hasköy’de el-Hâc Şaban mahallesinde sâkin Kerime bt. Tevekkül nâm hâtun meclis-i şer‘-i hatîr-i lâzımü’t-tevkīrde işbu hâmilü’l-kitâb zevc-i mutallıkı Hasan b. Mehmed nâm kimesne mahzarında üzerine takrîr-i da‘vâ edip mezbûr Hasan târih-i kitâbdan altı ay mukaddem beni tatlîk edip zimmetinde mütekarrir bin beş yüz akçe mehr-i müeccelim ve bir beledî döşek iki beledî yasdık ve yirmi beş zirâ‘ iplik ve on aded makrama ve bir futam kalmışdır suâl olunup alıverilmek matlûbumdur dedikde gıbbe’s-suâl mezbûr Hasan cevâbında, mezbûre Kerime ile bin beş yüz akçe mehr-i müecceli ve zikri sebk eden eşyâ üzerine muhâla‘a etmiş idik dedikde bin beş yüz akçe mehr-i müecceli bedel-i hul‘ olduğunu ikrâr edip eşyâ-i mezkûreyi münkire olıcak mezbûr Hasan’ın takrîrine mutâbık beyyine taleb olundukda udûl-i müslimînden Ahmed Halîfe b. Abdullah ve Şaban b. Abdullah nâm kimesneler li ecli’ş-şehâde mahall-i şer‘a hâzırân olup istişhâd olunduklarında, fi’l-vâki‘ mezbûre Kerime târih-i kitâbdan altı ay mukaddem mezbûr Hasan ile bin beş yüz [akçe] mehr-i müecceli ve zikri sebk eden eşyâ üzerine hul‘ edip zevciyyete müte‘allik cemî‘ da‘vâ ve nizâ‘dan her biri âharın zimmetini ibrâ ve iskāt eyledileridi biz bu husûsa şâhidleriz şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri makbûle olmağın mâ vaka‘a gıbbe’t-taleb ketb olundu. Târihuhü’l-mezbûr. Şuhûdü’l-hâl: Mahmud b. Ahmed, Mustafa b. Veli, Yakub b. Kurd, Mustafa Beşe b. Mahmud, Cafer b. Abdullah, Mustafa el-Muhtesib, Receb Efendi b. Abdi ve gayruhüm mine’l-hâzırîn.