Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 124 Hüküm no: 106 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Başdefterdâr Ömer Efendi’nin çiftlik ve tarlalarının Kostantin v. Kurd ve validesi Pilaşe bt. Kostantin’e satılması Atebe-i aliyye-i sultâniyye ve südde-i seniyye-i hâkāniyyede sâbıkan başdefterdâr olan kıdvetü erbâbi’l-ikbâl, umdetü ashâbi’l-iclâl Ömer Efendi -dâme mecduhû- taraf-ı refî‘lerinden husûs-ı âti’z-zikri ikrâra vekîl olup hasm-ı câhid-i şer‘î mahzarında Hasan Bey b. Mehmed ve İbrahim Bey b. Abdullah şehâdetleri ile şer‘an vekâleti sâbite olan fahrü’l-akrân el-Hâc Yusuf Bey b. Abdülmennân mahfil-i kazâda işbu kitâb-ı sıhhat-nisâbın sâhibleri Kostantin v. Kurd nâm zimmî tarafından ikrâr-ı âti’z-zikri tasdîka vekîl olup kezâlik hasm-ı câhid mahzarında Yusuf Bey b. Abdülkahir ve Kabil Bey b. Abdülkādir şehâdetleri ile şer‘an vekâleti sâbite olan Yorgaki v. Maryos nâm zimmî merkūm Kostantin’in vâlidesi Pilaşe bt. Kostantin nâm Nasrâniye tarafından dahi ikrâr-ı câ’i’l-beyânı tasdîka vekîl olup hasm-ı câhid mahzarında şâhidân-ı mezbûrân şehâdetleri ile kezâlik vekâleti sâbite olan Mustafa Bey b. Mehmed nâm Yesârî mahzarlarında bi’l-vekâle ikrâr-ı tâm ve takrîr-i kelâm edip mezbûre Pilaşe’nin zevci ve merkūm Kostantin’in babası olup bundan akdem mağsûben katl olundukda mecmû‘ terekesi cânib-i mîrîden kabz olunan mezbûr Kurd v. Rali nâm hâlikin muhallefâtını bey‘a ve semeni kabz ve Hazîne-i âmireye teslîme taraf-ı saltanat-ı aliyyeden memûr ve me’zûn olan düstûr-ı mükerrem, müşîr-i müfahham, nizâmü’l-âlem, nâzımü’l-umûri’l-ümem, sâhibü’r-re’y ve’t-tedbîr, vezîr-i dilîr-i reviş-zamîr Bayram Paşa -yesserallâhu mâ yürîdü ve mâ yeşâ’- hazretlerinin müvekkilim mûmâ-ileyh Ömer Efendi sulbî sagīr oğulları Mustafa Çelebi için semen-i ma‘lûma velâyeten iştirâ eyledikleri hâlik-i merkūmun muhallefâtından Havâss-ı Refî‘a kazâsına tâbi‘ Küçükköy demekle ma‘rûfe karyede vâki‘ yine Kurd Çiftliği demekle ma‘rûf inde’l-ahâlî ma‘lûmü’l-hudûd bir bâb fevkānî odayı ve birbirine mukābil tahtânî iki bâb odayı ve sofayı ve bir ahırı ve samanlığı ve üç göz anbarı ve çâr-ı duvar havluyu müştemil olup çiftlik ta‘bîr olunan menzili ve yine hâlik-i mezbûrun metrûkâtından paşa-yı müşârün-ileyh hazretlerinden sagīr-i mezbûr için velâyeten iştirâ eyledikleri çiftlik-i mezbûra intimâ ile tahdîd ve tavsîfden müstağnî birbirine muttasıl olup eşcâr-ı müsmire-i mütenevvi‘ayı müştemil olan iki kıt‘a bağı, mezbûr Kostantin ve vâlidesi mezbûre Pilaşe’ye ale’l-iştirâki’s-seviy velâyeti hasebiyle tâmmü’l-vezn ve sahîhü’l-ayâr bin kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘i ve safka-i vâhide ile bey‘ ve teslîm edip onlar dahi ber vech-i iştirâk iştirâ ve tesellüm eylediklerinden sonra merhûm ve mağfûrun-nişân Sultan Bayezid Hân evkāfı arâzisinden olup kadîmden çiftlik-i mezbûra tâbi‘ mevâzi‘-i müte‘addide vâki‘ yine paşa-yı mûmâ-ileyh hazretlerinin sâhib-i arz ma‘rifetiyle sagīr-i mezbûr için velâyeten tefvîz eyledikleri dokuz kıt‘a tarlaların dahi hakk-ı tasarruflarını, yine sâhib-i arz ma‘rifetiyle iki yüz kıt‘a mezbûrü’n-na‘t riyâl guruş mukābelesinde velâyetleri hasebiyle mezbûrân Kostantin ve vâlidesi Pilaşe’ye ale’s-seviyye tefvîz edip onlar dahi tefevvuz ve kabûl eylediklerinden sonra bedel-i tefvîz olan iki yüz kıt‘a guruş ile emlâk-i mezbûrenin semeni olan bin kıt‘a guruş ki cem‘an bin iki yüz kıt‘a guruş eder müvekkil-i mûmâ-ileyh Ömer Efendi mezbûrân Kostantin ve vâlidesi Pilaşe yedlerinden velâyeten bi’t-tamâm ve’l-kemâl ahz ve kabz eyledi ba‘de’l-yevm emlâk-i mezbûre mezbûrânın mülk-i müşterâları ve mezâri‘-i merkūme dâhil-i taht-ı tasarrufları olmuşdur dedikde vekîl-i mezbûr el-Hâc Yusuf Bey’in ber vech-i meşrûh cârî sâdır olan ikrâr ve takrîrini mezbûr Kostantin’in bâlâda mastûr olan vekîli merkūm Yorgaki ve mezbûre Pilaşe’nin vekîli merkūm Mustafa Bey her biri vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâbi‘ min Cumâdelâhire li sene seb‘a ve erba‘în ve elf. Şuhûdü’l-hâl: Mustafa Beşe b. Mahmud, Mustafa Çelebi b. Hamza, Mahmud b. Kurd, Mustafa b. Mehmed, Mahmud b. Ahmed, Mustafa b. Veli ve gayruhüm.