Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 126 Hüküm no: 107 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülahmer bt. Abdullah’ın kocasının kendisine olan bir kısım borcundan feragat etmesi Medîne-i Hazret-i Ebî Eyyûb el-Ensârî mahallâtından Çavuş Kasım mahallesi sâkinelerinden Gülahmer bt. Abdullah nâm hâtun meclis-i şer‘-i hatîr-i lâzımü’t-tevkīrde işbu hâmilü’l-kitâb zevci Ali Dede b. İlyas mahzarında bi tav‘ihâ ikrâr ve i‘tirâf edip zevcim mezbûr Ali Dede zimmetinde cihet-i karz-ı şer‘îden seksen aded riyâlî guruş hakkım olup meblağ-ı mezbûr seksen guruşdan on riyâlî guruş kıymetli bir mâî Londra çuka ferâcesin alıp bâkī altmış beş aded riyâlî guruşdan zevcim mezbûr Ali Dede’nin zimmetini ibrâ-i âmm ve kātı‘ü’n-nizâ‘la ibrâ ve iskāt eyledim ba‘de’l-yevm meblağ-ı mezbûra müte‘allik zevcim mezbûr Ali Dede ile da‘vâ ve nizâ‘ım kal[ma]mışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’t-tâsi‘ min Cumâdelâhire li sene seb‘a ve erba‘în ve elf. Şuhûdü’l-hâl: Fahrü’l-müderrisîn Avnullah Efendi, Hüseyin Çelebi b. Mehmed el-İmâm, Eyüb Halîfe b. ( ), Mehmed b. İsmail, Süleyman b. Veli, eş-Şeyh Ömer Efendi, Mustafa b. Ali, Şaban Halîfe b. ( ) el-Mütevellî, Mehmed b. Musa, Mehmed b. Avnullah, Mustafa Halîfe b. Mehmed, Süleyman b. Mehmed, Mehmed Dede, Süleyman b. İskender, Mehmed b. İbrahim ve gayruhüm.