Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 126 Hüküm no: 108 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahbula bt. Dede’nin bağ yerini Minnet b. Aydın’a sattığı Sâbıkan vilâyet-i Anadolu’da Ankara sancağında Bacı kazâsına tâbi‘ Dereköy demekle ma‘rûfe karye sâkinelerinden olup hâlâ medîne-i Hazret-i Ebî Eyyûb el-Ensârî mahallâtından Takyecibaşı mahallesinde sâkine olan Şahbula bt. Dede nâm hâtun meclis-i şer‘-i hatîr-i lâzımü’t-tevkīrde işbu hâmilü’l-kitâb Minnet b. Aydın nâm kimesne tarafından şirâ-i âti’z-zikre ve def‘-i semene vekîl olup hasm-ı câhid-i şer‘î mahzarında bimâ hüve nehcü’s-sübût şer‘an vekâleti sâbite olan karındaşı Hüseyin b. Aydın nâm kimesne mahzarında bi tav‘ihâ ikrâr ve i‘tirâf edip karye-i mezbûrede vâki‘ bir tarafdan Ömer bağı ve bir tarafdan merkūm Hüseyin bağı ve bir tarafdan şehir suyu demekle ma‘rûf nehr-i cârî ve bir tarafdan tarîk-i âm ile mahdûd olan tahmînen bir dönüm mülk bağ yerimi, müvekkil-i mezbûr Minnet için merkūm Hüseyin’e fıddî nakd-i râyic fi’l-vakt yüz elli akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ edip ol dahi müvekkili mezbûr Minnet için iştirâ ve kabûl eyledikden sonra semeni mezbûr yüz elli akçeyi vekîl-i mezbûr Hüseyin yedinden tamâmen alıp ahz ve kabz edip mebî‘-i mezbûru mahallinde zabt ve tasarrufa mezbûr Hüseyin’i taslît eyledim ba‘de’l-yevm zikr olunan bağ yeri mezbûr zimmînin mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde mukırr-ı mezbûre Şahbula’nın minvâl-i muharrer üzre cârî olan ikrârını vekîl-i mezbûr Hüseyin vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’t-tâsi‘ min Cumâdelâhire li sene seb‘a ve erba‘în ve elf. Şuhûdü’l-hâl: Fahrü’l-kuzât Hüseyin Efendi b. Mehmed, Ahmed b. Hüseyin el-Bevvâb-ı sultânî, Mustafa b. Aydın, Mustafa b. Veli.