Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 127 Hüküm no: 109 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiryaki v. Mihal’in Lambo v. Angelos’un borcuna kefâleti Havâss-ı Refî‘a kazâsı müzâfâtından kasaba-i Çatalca mahallâtından Papa Anastaş mahallesinde sâkin Doriki v. Kosta nâm zimmî mahfil-i kazâda işbu bâ‘isü’l-kitâb Kiryaki v. Mihal muvâcehesinde ikrâr ve takrîr-i kelâm edip mezbû[r] Kiryaki’nin gāib ani’l-meclis Lambo v. Angelos nâm zimmî zimmetinde cihet-i karz-ı şer‘îden beş bin akçe hakkı olup ben meblağ-ı mezbûra emr ve kabûlü hâviye kefâlet-i sahîha-i şer‘iyye ile kefîl bi’l-mâl olmağın mezbûr Kiryaki zikr olunan beş bin akçeyi kefâletim hasebiyle benden taleb etmekle ben dahi mahalle-i mezbûrede vâki‘ bir tarafı hasırcı Dimitri mülkü ve bir tarafı Kasab Laskari mülkü ve bir tarafı değirmenci Yorgi mülkü ve bir tarafı tarîk-i âm ile mahdûd olan mülk menzilimi, meblağ-ı mezbûr mukābelesinde rehin vaz‘ eyleyip ol dahi irtihân ve kabûl ve kabz eyledikden sonra meblağ-ı mezbûr beş bin akçeyi târih-i kitâbdan bir sene tamâmına değin te’cîl eyledi dedikde mukırr-ı mezbûr Doriki’yi târih-i kitâbdan cemî‘ ikrâr-ı meşrûhunda mezbûr Kiryaki vicâhen tasdîk ve meblağ-ı mezbûru vech-i muharrer üzre târih-i kitâbdan bir sene tamâmına değin te’cîl eylediğini şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min Cumâdelâhire li sene seb‘a ve erba‘în ve elf. Şuhûdü’l-hâl: Yakub b. Kurd, Mahmud b. Ahmed, Mustafa b. Veli, Cafer b. Abdullah, Dimitri [v.] Yani, Kostantin, Abacı Dimo, Niko [v.] İspilyot ve gayruhüm.