Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 250 Hüküm no: 296 Orijinal metin no: [47b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Savadyani bt. Kiryaki’nin Yorgo ve Sultana kardeşler aleyhindeki miras davasında sulh olması Mahmiye-i İstanbul’da Mirahor mahallesinde sâkine Savadyani bt. Kiryaki nâm Nasrâniye mahfil-i kazâda Havâss-ı Refî‘a kazâsı müzâfâtından Karık nâm karye sâkinelerinden olup zikri âtî menzil ve bağa vâzı‘ü’l-yed olan Yorgo nâm zimmî ve Sultana nâm zimmiye karındaşlar taraflarından husûs-ı âti’z-zikri sulhe ve bedel-i sulhü teslîme vekîl olup hasm-ı câhid mahzarında nehc-i şer‘î üzre vekâleti sâbite olan mezbûrân Yorgo ve Sultana’nın babaları Hristo v. Göka nâm zimmî muvâcehesinde ikrâr ve takrîr-i kelâm edip benim vâlidem olup bundan akdem hâlik olan [48a] Sofya bt. Koçgano nâm zimmiye mezbûrân Yorgo ve Sultana’nın anaları Trandafile’nin babası Dolo ile li ebeveyn karındaşlar olup babaları merkūm Koçgano’dan bi hasebi’l-irsi’ş-şer‘î intikāl eden karye-i mezbûrede vâki‘ ma‘lûmü’l-hudûd menzil ve bağ ve sâir muhallefâtından li’z-zekeri mislü hazzi’l-ünseyeyn fehvâsınca mezbûre Sofya’ya isâbet eden hisse-i şer‘iyyesi mezbûr Dolo yedinde kalıp ba‘de hâlikihî sulbiye kızı mezbûre Trandafil’e dahi vermeyip ba‘de hâlikihâ mezbûrân Yorgo ve Sultana’dan da‘vâ eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî mâbeynimize muslihûn tavassut edip husûs-ı mezbûrdan sekiz yüz nakd-i râyic fi’l-vakt fıddî akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı merkūm sekiz yüz akçeyi vekîl-i mezbûr Hristo yedinden bi’t-tamâm ve’l-kemâl ahz ve kabz edip husûs-ı merkūma müte‘allika da‘vâdan merkūmûn Hristo ve müvekkilleri Yorgo ve Sultana’nın zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d da‘vâ ve nizâ‘ım kalmadı dedikde mezbûre Savadya[ni]’nin ber vech-i meşrûh cârî ve sâdır olan ikrâr ve takrîrini vekîl-i mezbûr Hristo vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Târihuhü’l-mezbûr. Şuhûdü’l-hâl: Abdülkerim b. Mehmed, Ömer b. Siyâmi, Rıdvan b. Abdullah, Mahmud b. Ahmed, Sofyanos v. Kiryaki, İstati v. Nikola, İstati v. Marko ve gayruhüm.