Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 251 Hüküm no: 297 Orijinal metin no: [48a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasköy’de oturan bazı yahudilerin müştereken tasarruflarında olan bahçeyi Piyale Paşa Evkafı’na satmaları Havâss-ı Refî‘a kazâsı müzâfâtından Hasköy demekle ma‘rûfe olan karye sâkinlerinden dırağman Kemel v. Kemel ve diğer Kemel v. Paroh ve Avraham v. Nikon ve İsak ve Yasef ve Yahuda v. Abraham nâm Yahudiler mahfil-i kazâda mahmiye-i Galata müzâfâtından kasaba-i Kasımpaşa’da vâki‘ merhûm Piyâle Paşa evkāfı’na bi’l-fi‘l mütevellî olan bâ‘is-i hâze’l-kitâb Yahya Bey b. Ramazan mahzarında her biri bi’t-tav‘i’s-sâf ikrâr ve i‘tirâf edip karye-i merkūmede vâki‘ bir tarafı sâbıkan Yenişehir kadısı olan fazîletlü Abdürrahim Efendi mülkü ve bir tarafı ba‘zan Karnikos Pilsof nâm Yahudi mülkü ve ba‘zan mezbûr Abraham v. Nikon mülkü ve bir tarafı Yahudi kilisesi ve bir tarafı mekābir-i Nasârâ ile mahdûd olup etrâf-ı erba‘ası taş duvarı ve bir tahtânî kasrı ve üç bi’r-i mâ ve eşcâr-ı müsmire ve mütenevvi‘ayı müştemil bennâ zirâ‘ı ile tûlen yetmiş bir buçuk ve arzen elli altı zirâ‘ bi hesâb-ı şatrancî üç bin dokuz yüz yetmiş altı buçuk zirâ‘ olup ale’l-iştirâki’s-seviy mülk-i müşterâmız olan bahçemizi cânib-i vakf-ı mezbûr için mütevellî-i merkūm Yahya Bey’e tâmmü’l-vezn ve sahîhü’l-ayâr sekiz yüz kıt‘a riyâlî kebîr guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip mezbûr Yahya Bey dahi tevliyyeti hasebiyle vakf-ı mezbûra akār olmak için mâl-ı vakf-ı mezbûr ile mezbûrü’n-na‘t sekiz yüz kıt‘a riyâlî kebîr guruşa iştirâ ve tesellüm eyledikden sonra semen-i mezbûr sekiz yüz kıt‘a riyâlî kebîr guruşu yedinden bi’t-tamâm ve’l-kemâl ahz ve kabz eyledik. Min ba‘d bizim alâka ve medhalimiz kalmadı dediklerinde mukırrûn-ı mezbûrûnu cemî‘ ikrâr-ı meşrûhlarında mütevellî-i merkūm Yahya vicâhen tasdîk ve zikr olunan bahçeyi mâl-ı vakf-ı mezbûr ile vakfa akār etmek için minvâl-i meşrûh üzre iştirâ ve kabz ve tesellüm eylediğini şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Mehmed Efendi b. Yusuf el-İmâm, Mehmed Halîfe b. ( ) el-Müezzin, İbrahim Halîfe b. ( ) el-Müezzin, Ahmed Çelebi b. Mustafa Kâtib-i vakıf, Mehmed Çelebi b. Ramazan, Mustafa Bey b. Abdullah, Hüseyin Ded[e] b. Hamza, Mehmed b. Hüseyin, Mehmed b. Bahtiyar, Mustafa b. Veli.