Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 251 Hüküm no: 298 Orijinal metin no: [48a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çoban Atanaş v. Nika’nın kendisini dövdüğünü iddia ettiği Yani v. Meleş ile anlaşması Çoban tâifesinden Atanaş v. Nika nâm zimmî mahfil-i kazâda işbu bâ‘isü’l-kitâb Yani v. Meleş nâm zimmî tarafından sulh-i âti’z-zikri ikrârı tasdîka vekîl olup hasm-ı câhid mahzarında nehc-i şer‘-i üzre vekâleti sâbite olan Yorgi v. Lambo nâm zimmî muvâcehesinde ikrâr ve takrîr-i kelâm edip mezbûr Yani târih-i kitâbdan yedi gün mukaddem Havâss-ı Refî‘a kazâsı müzâfâtından Çavuşköy demekle ma‘rûfe olan karye kurbunda işbu hâzır bi’l-meclis olan Pîrî b. Abdi nâm kimesnenin koyunların ra‘y ederken çoban deyneği ile başımın sol tarafına urup beni mecrûh etmekle ben dahi da‘vâ üzre idim el-hâletü hâzihî mâbeynimize muslihûn tavassut edip mezbûr Yani üç yüz elli nakd-i râyic fi’l-vakt akçe bana merhem-bahâ vermek üzre beynimize inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr üç yüz elli akçeyi yedinden bi’t-tamâm ahz ve kabz edip husûs-ı merkūma müte‘allik da‘vâdan mezbûr Yani’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d da‘vâ ve nizâ‘ım kalmadı dedikde mukırr-ı mezbûr Atanaş’ın vech-i meşrûh üzre cârî olan ikrârını vekîl-i mezbûr Yorgi vicâhen tasdîk [48b] ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mustafa Beşe b. Mehmed, Mustafa b. Mahmud, Ahmed Bey b. Mehmed, Yakub b. Kurd, Mustafa b. Ahmed, Ali b. Ahmed, Ali b. Mustafa, Mustafa b. Mehmed, Mustafa b. Veli, Cafer b. Abdullah.