Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 252 Hüküm no: 299 Orijinal metin no: [48b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristalo bt. Yorgi’nin menzilinin yarısını eşi Yani v. İskarlet’e sattığı Vilâyet-i Rumeli’nde Çatalca kazâsına tâbi‘ Gorgosterva nâm karye sâkinelerinden Hristalo bt. Yorgi nâm Nasrâniye tarafından bey‘-i âti’z-zikre vekîl olup vekâleti Mihal v. Yorgi ve Yorgi v. Todori şehâdetleri ile şer‘an sâbite olan Pavlo v. Yani nâm zimmî mahfil-i kazâda mezbûre Hristalo’nun zevci işbu hâmilü’s-sifr Yani v. İskarlet nâm zimmî muvâcehesinde bi’l-vekâle ikrâr ve takrîr-i kelâm edip müvekkilem mezbûre Hristalo’nun karye-i mezbûrede vâki‘ bir tarafdan Yani v. Komino mülkü ve bir tarafdan Hristo v. Dimo mülkü ve iki tarafdan tarîk-i âm ile mahdûd bir bâb fevkānî beyti ve bir samanlığı ve eşcâr-ı müsmire ve gayr-ı müsmire bostan yerini müştemil olup babası hâlik-i mezbûr Yorgi ve kız karındaşı Arhondi nâm hâlikeden kendine intikāl edip mülk-i mevrûsu olan menzilin nısf-ı şâyi‘i babası hâlik-i mezbûrun zarûret-i düyûn-ı müsbetesini edâ etmek için vekâlet-i mahkiyem hasebiyle zevci mezbûr Yani’ye fıddî nakd-i râyic fi’l-vakt üç bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr üç bin akçeyi mezbûr Yani yedinden bi’t-tamâm ve’l-kemâl alıp kabz eylediğimden sonra mebî‘-i mezbûru mahallinde ahz ve kabza müşterî-i mezbûr Yani’yi taslît eyledim ba‘de’l-yevm zikr olunan menzilin nısf-ı şâyi‘i mezbûr Yani’nin mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Mehmed b. Ali, Mahmud b. Ahmed, Mustafa b. Veli, Ali b. Mustafa, Yani [v.] Mihal, Yani [v.] Dimo, Dimo [v.] Kiryazi, Dimo [v.] Yani, Yani [v.] Dimo, Petro [v.] Yani, Todori [v.] Niko, Kosta [v.] Todori, Pavlo [v.] İstemad, Mitro [v.] Mihal, Mihal [v.] Yani ve gayruhüm.