Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 253 Hüküm no: 301 Orijinal metin no: [48b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ramazan’ın menzilini Belkıs bt. Abdullah ile eşi Hamza b. Ali’ye sattığı Mahmiye-i Kostantıniyye hısnı ebvâbından Topkapısı hâricinde vâki‘ Elikzâde? mahallesinde sâkin Mehmed Çelebi b. Ramazan mahfil-i kazâda kendi tarafından asıl ve zevcesi Belkıs bt. Abdullah tarafından şirâ-i âti’z-zikre vekîl olup bimâ hüve nehcü’s-sübût şer‘an vekâleti sâbite olan Hamza b. Ali muvâcehesinde bi’t-tav‘ ve’r-rızâ ikrâr ve i‘tirâf edip işbu akdin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan ba‘zan vakıf tarla ve ba‘zan Sâliha Hâtun mülkü ve bir tarafdan Mirza Çavuş mülkü ve bir tarafdan yine kendi mülkü ve taraf-ı râbi‘den tarîk-i âm ile mahdûd bir bâb tahtânî çatma odayı ve zât eşcâr-ı müsmire ve gayr-ı müsmireli hadîkayı müştemil mülk menzilimi, mezbûr Hamza’ya fıddî nakd-i râyic fi’l-vakt beş bin iki yüz akçeye bey‘-i bâtt-ı sahîh-i şer‘î ile bey‘ edip ol dahi nısfı kendi nefsi için ve nısf-ı âharını müvekkilesi mezbûre Belkıs için vech-i muharrer üzre iştirâ ve kabûl eyledikden sonra kabz-ı semen-i mahdûd ve teslîm-i mebî‘-i mahdûd eyledim ba‘de’l-yevm menzil-i mahdûd-ı merkūm mezbûrân Hamza ve Belkıs’ın ber vech-i iştirâk mülk-i müşterâları olmuşdur dedikde mukırr-ı merkūm Mehmed Çelebi’nin ikrâr-ı meşrûhunu el-mukarru lehü’l-merkūm Hamza bi’l-asâle ve bi’l-vekâle vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-hâdî aşer min Ramazâni’l-mübârek li sene seb‘a ve erba‘în ve elf. Şuhûdü’l-hâl: Fazlullah Halîfe b. Ramazan el-İmâm, Mustafa b. Ahmed, el-Hâc Osman b. Musa, Ahmed Dede b. Abdullah, Mehmed Çelebi b. ( ), Siyavuş b. Abdullah, İsmail b. Abdullah, Mahmud b. Ahmed ve gayruhüm.