Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 254 Hüküm no: 302 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi ve Ahmed Çelebi kardeşlerin tasarrufunda olan vakıf çayırların sınırlarının belirlenmesi Bi’l-fi‘l Mirahor-ı kebîr olan iftihârü’l-emâcid ve’l-ekârim câmi‘ü’l-mehâmid ve’l-mekârim Halil Ağa hazretleri taraf-ı karînü’ş-şereflerinde husûs-ı âti’z-zikri ikrâra hasm-ı câhid mahzarında nehc-i şer‘î üzre vekâleti sâbite olup bi’l-fi‘l Istabl-ı âmire kethüdâsı olan kıdvetü’l-emâsil ve’l-akrân Ahmed Ağa mahfil-i kazâda zikri âtî bir kıt‘a çayıra mutasarrıflar olan işbu bâ‘iseyi’l-kitâb İbrahim Çelebi ve Ahmed Çelebi ibney Ali muvâcehelerinde bi’l-vekâle ikrâr ve takrîr-i kelâm edip mîrî çayırların hudûd ve sınırları muhtel ve müşevveş olmağla her birinin üzerine varılıp ehl-i vukūf ihbârı ile hudûdu ta‘yîn ve tebeyyün ve müceddeden alâmetler vaz‘ olunup, sâbıkan mîrî çayırlardan iken mürûr-ı eyyâm ile âhar kimesneler tasarruflarında bulunan çayırlar ba‘de’s-sübûti’ş-şer‘î ke’l-evvel cânib-i mîrîye hükm ve zabt olunmak fermân olunmağın, Havâss-ı Aliyye kazâsı müzâfâtından Terkos nâhiyesine tâbi‘ Arnavud Filyozu nâm karyede vâki‘ Kadı Çayırı demekle ma‘rûf mezbûrân İbrahim Çelebi ve Ahmed Çelebi cümlesi merhûm ve mağfûrun-leh Sultan Bayezid Hân -aleyhi’r-rahmetü ve’l-gufrân- vakfı olmak zu‘mu ile mutasarrıf oldukları bir tarafı Osman Bey çayırı ve bir tarafı mîrî çayır ve bir tarafı dere ve bir tarafı tarîk-i âm ile mahdûd tûlen ve arzen yüz seksen hatve çayırın ber mûceb-i fermân-ı âlî üzerine vardıkda mezbûr Osman Bey çayırı tarafından altmış hatvesi kadîmden Sultan Bayezid Hân vakfı ve mîrî çayıra muttasıl olan tarafından yüz yirmi hatvesi mîrî çayırlardan olduğu zeyl-i kitâbda mastûrü’l-esâmî olan ehl-i vukūf ihbârıyla ma‘lûm olmağın zikr olunan yüz yirmi hatve çayır cânib-i mîrîden zabt olunup etrâfında alâmetler vaz‘ olundukdan sonra merhûm-ı mezbûr Sultan Bayezid vakfı olan altmış hatve çayır mezbûrân İbrahim Çelebi ve Ahmed Çelebi yedlerinde ibkā olunmuşdur. Mârrü’z-zikr altmış hatve çayırda mîrînin alâka ve medhali kalmadı dedikde vekîl-i müşârün-ileyh Ahmed Ağa’nın minvâl-i meşrûh üzre bi’l-vekâle cârî ve sâdır olan ikrâr ve takrîrini mezbûrân İbrahim Çelebi ve Ahmed Çelebi bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ gıbbe’t-taleb ketb olundu. Fî evâili Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Ahmed Çelebi b. Ali es-Sarrâcü’s-sultânî, Cafer b. Halil Korucu, Mustafa b. Abdullah korucu, Receb Efendi b. Abdi, Mustafa b. Kalender, Kurd b. Abdullah.