Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 256 Hüküm no: 304 Orijinal metin no: [49a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Komino’nun Koristalo bt. Yorgi aleyhindeki miras davasından vazgeçtiği Vilâyet-i Rumeli’nde Çatalca kazâsında Gazaz? nâm-ı diğer Kuşterde nâm karyede hâlike olan Arhondi bt. Yorgi nâm Nasrâniyenin verâseti li ebeveyn kız karındaşı Koristalo ile li ebeveyn ammisi Yani v. Komino’ya münhasıra olduğu müte‘ayyin oldukdan sonra merkūm Yani mahfil-i kazâda işbu bâ‘isetü’l-kitâb merkūme Koristalo tarafından ikrâr-ı âti’z-zikri tasdîka vekîl olup hasm-ı câhid mahzarında nehc-i şer‘î üzre vekâleti sâbite olan zevci diğer Yani v. İskarlet muvâcehesinde ikrâr ve takrîr-i kelâm edip mûrisemiz merkūme Arhondi’nin muhallefâtından karye-i merkūmede vâki‘ lede’l-cîrân ma‘lûmü’l-hudûd olan menzilinden ve samanlık ve mülk bostan ve sâir metrûkâtından bi hasebi’l-irsi’ş-şer‘î bana isâbet eden nısf hisse-i şer‘iyyemi mezbûre Ko[ri]stalo’dan da‘vâ ve taleb üzre idim el-hâletü hâzihî terk-i da‘vâ edip mûrisemiz hâlike-i mezbûre Arhondi’nin muhallefâtından bana âid olan hisse-i şer‘iyyeme müte‘allik da‘vâdan mezbûr Koristalo’nun zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d da‘vâ ve nizâ‘ım kalmadı dedikde mukırr-ı mezbûr Yani’nin vech-i muharrer üzre cârî olan ikrârını vekîl-i mezbûr diğer Yani vicâhen tasdîk ve tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’l-hâmis aşer min Ramazâni’l-mübârek li sene seb‘a ve erba‘în ve elf. Şuhûdü’l-hâl: Mehmed Efendi el-İmâm, Ali Ağa b. Mehmed Efendi, Mehmed Ağa Kethüdâ-yı berber-i sâbık, Mehmed Çavuş b. ( ), Halil Çelebi, Yani [v.] Dimo, Pavlo [v.] Yani, Mihal [v.] Yorgi, Şiro [v.] Dimo, Yorgi [v.] Todori, Şiro [v.] Yani, Dimo [v.] Yani, Rizo [v.] Dimo, Yani [v.] Mihal, Todori [v.] Nikola, Hristo [v.] Dimo, Mihal [v.] Yorgi, Dimo [v.] Nikola, Yani [v.] Dimo, Dimo [v.] Kiryazi.