Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 257 Hüküm no: 305 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. Yani’nin Trapoliçe’deki menzil ve tarlalarını Kanola v. Dimo’ya sattığı Vilâyet-i Rumeli’nde cezîre-i Mora’da Trapoliçe kazâsına tâbi‘ Vahle nâm karye sâkinlerinden Kosta v. Yani nâm zimmî meclis-i şer‘-i hatîr-i lâzımü’t-tevkīrde yine karye-i mezbûre sâkinlerinden işbu hâmilü’s-sifr Kanola v. Dimo nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Dimo v. Lazi mülkü ve bir tarafdan İstati v. Simo mülkü ve bir tarafdan dere ve bir tarafdan tarîk-i âm ile mahdûd bir bâb fevkānî ve bir bâb tahtânî iki beyti ve bir çatma anbarı müştemil mülk menzilimi ve menzil-i mezbûre muttasıl kırk dip zeytin ve otuz dip dut eşcârını müştemil bahçeyi ve karye-i mezbûre kurbunda çeşmeye muttasıl ak dut eşcârını ve esmârını müştemil bir kıt‘a bahçemi ve yine karye-i mezbûre sınırında vâki‘ lede’l-ahâlî ve’l-cîrân ma‘lûmü’l-hudûd iki kıt‘a otuz bir akçelik mülk bağımı mezbûr Kanola’ya târih-i kitâbdan bir sene mukaddem fıddî nakd-i râyic fi’l-vakt beş bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile bey‘ edip ol dahi vech-i meşrûh üzre iştirâ ve kabûl eyledikden sonra yine karye-i mezbûre hudûdu dâhilinde mevâzi‘-i adîdede vâki‘ lede’l-ahâlî ve’l-cîrân ma‘lûmü’l-hudûd otuz kıt‘a altı keyl tohum istî‘âb eder taht-ı tasarrufumda [olan] tarlalarımın dahi bir sene mukaddem hakk-ı tasarrufunu sâhib-i arz ma‘rifetiyle mezbûr Kanola’ya bin akçe mukābelesinde tefvîz edip ol dahi vech-i meşrûh üzre tefvîz ve kabûl ettiğinden sonra semen-i mezbûr beş bin akçe ile bedel-i tefvîz olan bin akçe ki cem‘an altı bin akçeyi mezbûr Kanola yedinden bi’t-tamâm ve’l-kemâl ahz ve kabz edip mebî‘-i mezbûru mahallinde ahz ve kabza ve tarlaları zabt ve tasarrufa mezbûr Kanola’yı taslît eylemiş idim târih-i mezbûrdan beri zikr olunan menzil ve bahçeler ve bağlar merkūm Kanola’nın mülk-i müşterâsı ve tarlalar dâhil-i taht-ı tasarrufu olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ aşer min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: İsmail Beşe b. Kasım, Fazlullah b. Selim, Ali b. Mustafa, Todori [v.] Apostol, Kosta [v.] Yani, Polihroni [v.] Vinço, İstati [v.] Şimo, Argiri [v.] İspilyot, Yani [v.] İstemad, İstemad [v.] Kosta, Panayot [v.] Yani.