Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 257 Hüküm no: 306 Orijinal metin no: [49b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Asanine bt. Nikola’nın menzilini Hasan Paşa Vakfı’na sattığı Mahmiye-i Kostantıniyye hısnı ebvâbından Edirnekapısı dâhilinde Sarmaşık mahallesinde sâkine Asanine bt. Nikola nâm Nasrâniye mahfil-i kazâda Hasan Paşa vakfı’na câbî ve kāimmakām-ı mütevellî olan Mehmed Halîfe b. Ali mahzarında ikrâr ve takrîr-i kelâm edip vakf-ı mezbûrdan olup mahmiye-i mezbûre hısnı ebvâbından Ebî Eyyûb el-Ensârî kapısı dâhilinde Mustafa Paşa-yı atîk mahallesinde vâki‘ iki tarafdan vakf-ı mezbûr ve bir tarafdan Hançerli Sultan sarayı ve bir tarafdan tarîk-i âm ile mahdûd olup bir bâb fevkānî ve bir bâb tahtânî iki beyti ve kenîfi müştemil olup icâre-i mu‘accele ve beher şehr seksen beş akçe icâre-i müeccele ile taht-ı îcârımda olan menzilin dokuz aylık icâre-i mu‘accelesinden zimmetimde yedi yüz altmış beş akçe müctemi‘ olup meblağ-ı mezbûru edâya kudretim olmamağın cânib-i vakıfda olan icâre-i mu‘accelemden ferâgat edip menzil-i mezbûru yine cânib-i vakfa ferâğ eyledim benim alâka [ve] medhalim kalmadı dedikde mukırra-i mezbûre Asanine’nin minvâl-i muharrer üzre cârî olan ikrârını merkūm Mehmed vicâhen tasdîk ve menzil-i mezbûru vech-i meşrûh üzre vakıf için kabz ve tesellüm eylediğini şifâhen tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’l-hâmis aşer min şehri Ramazâni’l-mübârek li sene seb‘a ve erba‘în ve elf. Mustafa b. Ahmed, Receb Efendi b. Abdi, Mustafa b. Mehmed, Ali b. Mustafa, Mahmud b. Ahmed, Yakub b. Kurd.