Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 258 Hüküm no: 307 Orijinal metin no: [49b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Hızır’ın Mihal v. Yani aleyhindeki hırsızlık davasını ispat için süre verilmesi Vilâyet-i Rumeli’nde kasaba-i Vidin sâkinlerinden Hasan b. Hızır nâm kimesne Havâss-ı Refî‘a kazâsı müzâfâtından Terkos nâhiyesine tâbi‘ Yeniköy demekle ma‘rûfe olan karyeden Mihal v. Yani nâm zimmîyi ve sâir ahâlîsi dergâh-ı âlî çavuşlarından el-Hâc Hüseyin Çavuş mübâşeretiyle mahfil-i kazâya ihzâr ve mahzarlarında üzerlerine takrîr-i da‘vâ edip târih-i kitâbdan yirmi beş gün mukaddem Eflak vilâyetinden mahmiye-i İstanbul’a gelirken karye-i merkūmede mezbûr Mihal’in önünde nüzûl edip gece ile yatarken başım altında eyer heybesi içinde mahfûz olan yüz seksen kıt‘a riyâlî guruşum ve otuz üç aded sikke-i hasenem ve bin altı yüz hurda akçem başım altından zâyi‘ oldu. Zannım mezbûr Mihal’dendir, vâki‘ hâl suâl olunup ihkāk-ı hak olunması matlûbumdur dedikde gıbbe’s-suâl ve’l-inkâr müdde‘î-i mezbûrdan da‘vâsına mutâbık beyyine taleb olundukda ikāmet-i beyyine için istimhâl etmeğin mehil-i şer‘î ile imhâl olundukdan sonra karye-i merkūme ahâlîsinden Yorgi v. Kiti ve Atanaş v. Yorgi ve Yorgo v. Aleksi ve Aleksi v. Kosta ve Pavlo v. Dimo ve Andriye v. İskarlet ve Yorgi v. Todori ve Yorgo v. Yani ve Todori v. İstemad ve Atanaş v. Yorgi ve Pandazi v. Palo ve Hristo v. Pandazi nâm zimmîler ve sâirleri mezbûr Mihal’in nefsine her biri kefîl ve hîn-i mütâlebede meclis-i şer‘a ihzârına müte‘ahhidler olup ve mezbûrûn zimmîler dahi bir birinin nefsine kefîller olmağın mâ hüve’l-vâki‘ gıbbe’t-taleb ketb olundu. Fi’l-yevmi’s-sâdis min Ramazâni’l-mübârek li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mustafa b. Ahmed, Mehmed b. Ahmed, Ali b. Mustafa, Ali b. Abdullah.