Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 259 Hüküm no: 308 Orijinal metin no: [50a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Dede b. Bahadır’ın Kanadak v. Todori’de olan alacağını taksitlendirmesi Medîne-i Hazret-i Ebî Eyyûb el-Ensârî mahallâtından Câmi‘-i Kebîr mahallesi sâkinlerinden Mustafa Dede b. Bahadır nâm kimesne meclis-i şer‘-i hatîr-i lâzımü’t-tevkīrde ekmekçi tâifesinden Kanadak v. Todori nâm Ermeni muvâcehesinde ikrâr ve takrîr-i kelâm edip mezbûr Kanadak zimmetinde buğday bahâsından dört bin beş yüz akçe hakkım olup meblağ-ı mezbûru târih-i kitâbdan otuz ay tamâmına değin beher şehr yüz ellişer akçe edâ etmek üzre taksît eyledim dedikde mezbûr Mustafa Dede’nin minvâl-i meşrûh üzre cârî olan ikrârını merkūm Kanadak bi’l-muvâcehe tasdîk ve meblağ-ı mezbûrun vech-i meşrûh üzre taksîti kabûl eylediğini bi’l-müşâfehe tahkīk etmeğin mâ vaka‘a gıbbe’t-taleb ketb olundu. Tahrîren fî gurreti Ramazâni’l-mübârek li sene seb‘a ve erba‘în ve elf. Şuhûdü’l-hâl: Mustafa b. Mahmud, Mahmud b. Ahmed, Mustafa b. Veli, Ali b. Abdullah, Mustafa Beşe b. Mahmud, Ali b. Mustafa, Mustafa b. Mehmed, Cafer b. Abdullah.