Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 260 Hüküm no: 310 Orijinal metin no: [50a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Hasan’ın boşandığı eşi Arslan b. Mehmed’in zimmetini ibra etmesi Medîne-i Hazret-i Ebî Eyyûb el-Ensârî mahallâtından Evlice Baba mahallesinde sâkine Âişe bt. Hasan tarafından ikrâr-ı âti’z-zikre vekîl olup vekâleti mezbûre Âişe’yi ma‘rifet-i şer‘iyye ile ârifeyn olan Mahmud Efendi b. Mehmed el-İmâm ve Mehmed b. [E]mri? şehâdetleri ile şer‘an sâbite olan mezbûr Âişe’nin vâlidesi Gülistan bt. Abdullah nâm hâtun meclis-i şer‘-i hatîr-i lâzımü’t-tevkīrde mezbûr Âişe’nin zevc-i mutallıkı olan işbu hâmilü’l-kitâb Arslan b. Mehmed mahzarında bi’l-vekâle ikrâr ve takrîr-i kelâm edip müvekkilem ve sadriye kızım mezbûre Âişe, mezbûr Arslan zimmetinde mütekarrir olan iki bin akçe mehr-i müeccelini ve nafaka-i iddetini mezbûr Arslan yedinden bi’t-tamâm ve’l-kemâl ahz ve kabz edip zevciyyete müte‘allik cemî‘ da‘vâdan mezbûr Arslan’ın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde mezbûr Arslan mezbûre Gülistan’ın minvâl-i meşrûh üzre bi’l-vekâle sâdır olan ikrârını bi’l-muvâcehe tasdîk ve kendisi dahi vech-i meşrûh üzre Âişe’nin zimmetini zevciyyete müte‘allik da‘vâdan ibrâ eylediğini tahkīk etmeğin mâ vaka‘a gıbbe’t-taleb ketb olundu. Tahrîren fi’l-yevmi’s-sâdis aşer min Ramazâni’l-mübârek li sene seb‘a ve erba‘în ve elf. Şuhûdü’l-hâl: Mustafa b. Şaban el-Müezzin, Halil b. Hasan, İbrahim b. Mehmed, Mustafa b. Murtaza, Ömer Halîfe el-Müezzin, Mustafa b. ( ).