Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 260 Hüküm no: 311 Orijinal metin no: [50a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Yani’nin bağını Yorgi v. Teofili’ye sattığı Vilâyet-i Rumeli’nde cezîre-i Mora’da Kartine kazâsına tâbi‘ Demincesne nâm karye sâkinlerinden Yorgi v. Yani nâm zimmî meclis-i şer‘-i hatîr-i lâzımü’t-tevkīrde yine kazâ-i mezbûre tâbi‘ İstemilce nâm karye sâkinlerinden işbu hâmilü’s-sifr Yorgi v. Teofili nâm zimmî muvâcehesinde bi’t-tav‘ ikrâr ve i‘tirâf edip karye-i mezbûre Demincesne sınırında vâki‘ bir tarafdan Yani v. Harkop bağı ve bir tarafdan Yorgi bağı ve bir tarafdan yine benim tasarrufumda olan tarla ve bir tarafdan tarîk-i âm ile mahdûd sakf altında bir kârgîr şırahâneyi müştemil bir kıt‘a mülk bağımı cümle tevâbi‘ ve levâhıkı ile mezbûr Yorgi’ye fıddî nakd-i râyic fi’l-vakt on bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr on bin akçeyi bi’t-tamâm ve’l-kemâl mezbûr Yorgi yedinden ahz ve kabz edip mebî‘-i mezbûru mahallinde ahz ve kabza mezbûr Yorgi’yi taslît eyledim ba‘de’l-yevm zikr olunan bağ ve şırahâne mezbûr Yorgi’nin mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ aşer min Ramazâni’l-mübârek li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Veli, Yakub b. Kurd, Dimitri b. İstemad, Argiri [v.] Kefale, Teofili [v.] Yorgi, Nikola [v.] Teofili, Dimitri [v.] Yani, Kosta [v.] Teofili, Panayot [v.] Aleksi, Teofili [v.] Yorgi, İstemad [v.] Yani, Dimitri [v.] Yani, Anastaş [v.] Yani, Yani [v.] Polihroni, Panayot [v.] Manol, Yorgo, Dimo [v.] Teofili, Yorgi [v.] Yani, Kanola ve gayruhüm.