Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 261 Hüküm no: 312 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Grofo bt. Agati’nin vefat eden kardeşi Dimitri v. Agati’nin metrukatını teslim aldığı Vilâyet-i Rumeli’nde Arkadya kazâsına tâbi‘ Zorce nâm karye sâkinlerinden Grofo bt. Agati nâm Nasrâniye tarafından husûs-ı âti’z-zikre vekîl olup, vekâleti Nikola v. Şatarno ve Kanar v. Anaştaş şehâdetleri ile sâbite olan Anasto v. Kalavritalı nâm zimmî mahfil-i kazâda mahmiye-i Kostantıniyye sınırı ebvâbından Kumkapı hâricinde vâki‘ Orta Meyhâne demekle ma‘rûf meyhânede meyhâneci olan râfi‘ü’l-kitâb Kantazi v. Argiri ve Dimitri v. Zaharo ve İstato v. Kostantin ve Todori v. Nikola nâm zimmîler muvâcehelerinde bi’l-vekâle takrîr-i kelâm edip müvekkilem mezbûre Grofo’nun li ebeveyn karındaşı Dimitri nâm zimmî mezbûrûn Kantazi ve Dimitri ve İstati ve Todori’nin meyhânelerinde hizmetkâr iken bundan akdem mürd oldukda, metrûkâtından sekiz bin nakid akçesin ve ba‘zı muhallefâtın mahmiye-i merkūmede beytülmâl emîni olan Ali Ağa ahz ve kabz ettikden sonra mezbûrûn yedlerinde kalan altı sahan ve iki kebe ve bir sepet sandığı vekâletim hasebiyle mezbûrûn yedlerinden ahz ve kabz eyledim yedlerinde mürd-i mezbûrun bir habbesi bâkī kalmayıp ba‘de’l-yevm mürd-i merkūmun muhallefâtına müte‘allik mezbûrlardan vechen mine’l-vücûh da‘vâ ve talebim kalmamışdır min ba‘d husûs-ı merkūme müte‘allik da‘vâdan ve mütâlebeden mezbûrûnun zimmetlerini bi’l-külliye ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a ketb olundu. Fi’l-yevmi’s-sâmin min Ramazâni’l-mübârek li sene seb‘a ve erba‘în ve elf. Şuhûdü’l-hâl: Panayot v. Yorgi, Yani v. İstemad, Polihroni v. Nikola, İstamo v. Yani, Zafiri v. Panayot, Teyodoraki v. Alalogo, Kosta v. Melayero, İstelyo v. ( ), Yorgi v. ( ).