Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 262 Hüküm no: 313 Orijinal metin no: [50b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati v. Yani’nin bağını Teofili v. Yorgi’ye sattığı Vilâyet-i Rumeli’nde cezîre-i Mora’da Kartine kazâsına tâbi‘ İstemilce nâm karye sâkinlerinden İstati v. Yani nâm zimmî meclis-i şer‘-i hatîr-i lâzımü’t-tevkīrde yine karye-i mezbûre sâkinlerinden işbu hâmilü’s-sifr Teofili v. Yorgi nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre hudûdu dâhilinde vâki‘ bir tarafdan İspilyot v. Lasari bağı ve bir tarafdan Polihroni v. Lasari bağı ve bir tarafdan Yani v. ( ) bağı ve bir tarafdan Yani v. Yorgi ile mahdûd ve mümtâz bir kıt‘a mülk bağımı mezbûr Teofili’ye fıddî nakd-i râyic fi’l-vakt iki bin sekiz yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr iki bin sekiz yüz akçeyi bi’t-tamâm ve’l-kemâl mezbûr Teofili yedinden ahz ve kabz edip mebî‘-i mezbûru mahallinde zabt ve tasarrufa mezbûr Teofili’yi taslît eyledim ba‘de’l-yevm sâlifü’z-zikr bağ mezbûr Teofili’nin mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ aşer min Ramazâni’l-mübârek li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Veli, Yakub b. Kurd, Mustafa b. Veli, Dimitri [v.] İstemad, Argiri [v.] Kefale, Teofili [v.] Yorgi, Nikola [v.] Teofili, Dimitri [v.] Yani, Kosta [v.] Nikola, Yorgi [v.] Raminova, Panayot [v.] Lefke, Teofili [v.] Yorgi, Kanola [v.] Yani, İstemad [v.] Yani, Dimitri [v.] Yani, Anastaş [v.] Yani, Panayot [v.] Manol.