Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 262 Hüküm no: 314 Orijinal metin no: [50b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani ve Panayot v. Aleksi Andriye kardeşlerin müşterek bağlarını Anastaş v. Yani’ye sattığı Vilâyet-i Rumeli’nde cezîre-i Mora’da Kartine kazâsına tâbi‘ İstemilce nâm karye sâkinlerinden Yani ve Panayot v. Aleksi Andriye nâm karındaşlar meclis-i şer‘-i hatîr-i lâzımü’t-tevkīrde yine karye-i mezbûre sâkinlerinden işbu hâmilü’s-sifr Anastaş v. Yani nâm zimmî muvâcehesinde her biri bi tav‘ihimâ ikrâr ve i‘tirâf edip karye-i mezbûrede vâki‘ bir tarafdan Papa Duka mülkü ve bir tarafdan Polihroni mülkü ve bir tarafdan Dimo v. Royet mülkü ve bir tarafdan ipek kârhânesi ile mahdûd ve mümtâz ale’l-iştirâki’s-seviy mülkümüz olup eşcâr-ı müsmire ve gayr-ı müsmireyi müştemil olan bir kıt‘a bostan yerimizi mezbûr Anastaş’a fıddî râyic fi’l-vakt dört bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr dört bin akçeden her birimizin hissesine isâbet eden ikişer bin akçeyi bi’t-tamâm ve’l-kemâl mezbûr Anastaş yedinden ahz ve kabz edip mebî‘-i mezbûru mahallinde zabt ve tasarrufa mezbûr Anastaş’ı taslît eyledik. Ba‘de’l-yevm sâlifü’z-zikr olan bostan yeri mezbûr Anastaş’ın mülk-i müşterâsı olmuşdur dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Es-Sâbikūn.