Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 264 Hüküm no: 317 Orijinal metin no: [51a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Ali’nin Hristo aleyhindeki davasında sulh olunması Medîne-i Ebî Eyyûb el-Ensârî sûkunda vâki‘ Orta fırın demekle ma‘rûf ekmekçi fırınında hizmetkâr olan Hasan b. Ali nâm kimesne mahfil-i kazâda Hristo nâm zimmî tarafından sulh-i âti’z-zikre ve bedel-i sulhü def‘a vekîl olup hasm-ı câhid mahzarında bimâ hüve nehcü’s-sübût şer‘an vekâleti sâbite olan sâlifü’z-zikr fırının müste’ciri Kiti v. Papa Kolo nâm zimmî muvâcehesinde bi tav‘ihî ikrâr ve takrîr-i kelâm edip târih-i kitâbdan bir gün mukaddem kubeyl-i mağribde zikr olunan fırının kapısı önünde mezbûr Hristo bıçak ile sağ elimin içinde urup mecrûh etmiş idi hâlâ da‘vâ sadedinde iken es-sulhu seyyidü’l-ahkâm muktezâsınca muslihûn tavassut edip mâbeynimizde husûs-ı mezbûrdan üç yüz akçe üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr üç yüz akçeyi mezbûr Kiti yedinden bi’t-tamâm ahz ve kabz edip husûs-ı mezbûra müte‘allik da‘vâdan mezbûr Hristo’nun zimmetini ibrâ ve iskāt eyledim ba‘de’l-yevm benden veya vekîlimden husûs-ı mezbûra müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-ışrîn min şehri Ramazâni’l-mübârek li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mahmud b. Ahmed, Mustafa b. Ahmed, Ali b. Abdi, Mustafa Beşe b. Mahmud, Yakub b. Kurd, Cafer b. Abdullah.